ئیسپانیا
یاریزانێکی ناوداری ئەتڵەتیکۆ مەدرید وازهێنانی لە یاریکردن ڕاگەیاند
یاریگا- گابی هێرناندێز، یەکێک لە ناوە دیارەکانی دوو دەیەی ڕابردووی یانەی ئەتڵەتیکۆ مەدریدی ئیسپانی وازهێنانی لە یاریکردن ڕاگەیاند.
گابی لە پێگەی ئینستاگرامی فەرمی خۆیەوە ئەو هەواڵەی ڕاگەیاند و نووسیویەتی: “کە دەستم کرد بە یاریکردن، هەرگیز ئەوەم بە خەیاڵدا نەهاتبوو کە خەونەکانم دەبێت بە ڕاستی. ئەمڕۆش کاتی ئەوەیە کۆتایی بە کاروانی وەرزشییم بهێنم وەک یاریزانێکی تۆپی پێ.”
ناوبراو تەمەنی 37 ساڵە و بە درێسی ئەتڵەتیکۆ مەدریدەوە 417 یاریی ئەنجام داوە و شەش نازناوی بردۆتەوە لەگەڵ ئەو یانەیە.
گابی ساڵی 2018 ڕۆخی بلانکۆسی جێهێشت و ڕووی کردە یانەی سەدی قەتەری.
