هیوادارم ناچار نەبم پەیوەندیی بە دێلا فوێنتێ بکەم؛ سکالۆنی پێش یارییەکەی ئینگلتەرا قسە دەکات

یاریگا –

لیۆنێل سکالۆنی، راهێنەری تیمی نیشتمانیی ئەرجەنتین لە کۆنگرەیەکی رۆژنامەوانیی پێش یارییەکەیدا بەرامبەر ئینگلتەرا قسەی کرد، کە تێیدا تیمەکەی هەوڵ دەدات بگاتە یاریی کۆتایی مۆندیال، ئەمەش رێگە خۆش دەکات بۆ ئەگەریی رووبەڕووبوونەوەیەک بەرامبەر ئیسپانیا.

ئیسپانیا

تەواوی یارییەکەم سەیر نەکرد، ئەوان شایستەی سەرکەوتن بوون. ئەمڕۆ یارییەکی گەورەیان پێشکەش کرد. لەگەڵ بەڕێوەچوونی پاڵەوانییەتییەکەدا ئاستیان بەرەو پێش چووە، ئەمە باشترین نمایشی ئەوان بوو لە مۆندیالدا.

دێلا فۆینتێ

بۆ ئەو دڵخۆشم، شاینیەتی. ئەو مرۆڤێکی نایابە. هەموو ئەو شتانەی لە تیمەکەیدا دەیانبینین، هیواداریین لە تیمەکەی خۆشماندا بیبینین. ئەگەر شتەکان بۆ ئێمە باش نەڕۆن، پەیوەندییەکی پێوە دەکەم. بەڵام ئەگەر لە یاریی کۆتاییدا بەرامبەری یاری بکەین… نەخێر. هیوادارم هیچ پەیوەندییەکی تەلەفۆنی نەبێت تاوەکوو دوای یاریی کۆتایی.

وێستهام

پێدەچێت لەوێ بە باشی یادم نەکەنەوە، سەردەمێکی نامۆ بوو. من بەو هیوایەوە چوومە ئەوێ کە وەکوو بەرگریی باڵی راست بچمە مۆندیال، بەڵام لە دوایین یارییدا هەڵەیەکم کرد کە بووە هۆی یەکسانبوونەوەی ئەنجامەکە لە یاریی کۆتایی جامی یەکێتیی ئینگلتەرا. ئەوە ژیانمی گۆڕی… بۆ باشتر، چونکە لەوێ هاوسەرەکەم ناسی و منداڵەکانم لەدایک بوون.

درێس

من داوام نەکردبوو بە رەنگی شین یاریی بکەین… ئەگەر توخێل کێشەیەکی لەگەڵ ئەمەدا نەبووبێت، ئەوا ئاساییە.

مێژوو

ئەمە یارییەکی تۆپی پێیە. ناتوانین تۆپی پێ و ئەوەی لەو سەردەمەدا روویدا تێکەڵ بکەین، ئەمەش لەبەر رێزگرتن لەو رووداوانە. ئەنجامدانی شتێکی لەو شێوەیە شێتایەتییە، نابێت ئەو دوو بابەتە تێکەڵ بکەین. بێگومان ئەرجەنتینییەکان لە بیری دەکەن، بەڵام یاریزانانی ئەمڕۆ چ بەرپرسیارێتییەکیان لەسەرە بەرامبەر ئەوەی لەو کاتەدا روویدا؟ ئەمە تەنیا تۆپی پێیە.

مارادۆنا

هەموومان ئەو یارییەی ساڵی 1986ـمان لە یادە، بە تایبەتی نمایشی دیێگۆ و لە سەرووی هەمووشیانەوە گۆڵی دووەمی. هەر کەسێک تۆپی پێی خۆش بوێت، بە باشترین شێوە ئەو یارییەی لە یادە.

دۆخی ئێستا

دڵنیانیم بە تەواوی لەو شوێنەین کە من دەمویست لێی بین، بەڵام مانگ و نیوێک لەمەوبەر ئامادەبووم واژوو لەسەر گەیشتن بە یاریی پێشکۆتایی بکەم. بۆ من گرنگ نییە چۆن گەیشتووینەتە ئێرە.

شیکاری

ئەمە یارییەکی جیاواز دەبێت لەو یارییەی بەرامبەر سویسرا ئەنجامماندا، هەوڵ دەدەین لە هەندێک لایەندا باشتر بین. لە دۆخێکی باشداین، ئەمە یاریی پێشکۆتایی مۆندیالە، جۆش و خرۆشمان وەکوو خۆیەتی. رووبەڕووی رکابەرێکی گەورە دەبینەوە و هیوادارم دەرفەتی سەرکەوتنمان هەبێت.

پێشکۆتایی

پێشتر یەکجار لەم قۆناخەدا یاریمان کردووە، بەڵام ئێستاش هەمان ئەو جۆش و خرۆشەمان هەیە کە لە یەکەمجاردا هەمانبوو. بە پەرۆشەوە چاوەڕێی دەکەین، با پێش دەستپێکردنی چێژی لێ وەربگرین. بەپێی بیرکردنەوەی من، تەنیا بوون لەم شوێنەدا خۆی لە خۆیدا شتێکی ناوازەیە.

پێکهاتەی سەرەکی

ئێمە هەمیشە سەیری ئەوە دەکەین چۆن تیمەکە باشتر بکەین. گۆڕانکاری ئەگەری هەیە، بەڵام رەنگە پارێزگاری لە هەمان پێکهاتەش بکەین. تیمەکە لە پێش هەموو شتێکەوەیە، من هیچ کاتێک بڕیار لەسەر بنەمای ئەوە نادەم کە یاریزانەکان لە رابردوودا چییان کردووە، بەڵکوو لەسەر بنەمای ئەوەی ئێستا پێشکەشی دەکەن بڕیار دەدەم.

بێڵینگهام و کەین

ئەوان لەنێو باشترین یاریزانەکانی جیهانن، لەو جۆرە یاریزانانەی کە هەر راهێنەرێک ئاواتەخوازە هەیبن.

رەخنەکانی ئینگلتەرا

من گوێم لێ نەبووە. لەو کاتەوەی بوومەتە راهێنەر، رەخنەم لە هیچ یاریزانێک نەگرتووە، جا چ چینی، ژاپۆنی یان ئەرجەنتینی بێت.

مێسی و ئینگلتەرا

لەو بارەیەوە قسەم لەگەڵ نەکردووە. هەمووان دەزانن چۆن مامەڵە لەگەڵ یاریی پێشکۆتایی مۆندیالدا بکەن، من دڵخۆش و سوپاسگوزارم کە دووبارە لێرەم. دەبێت قەدری ئەوە بزانین کە بەدەستمان هێناوە، ئەمە دەستکەوتێکی گەورەیە.

باشتربوون

ویست و تەماحی زۆرمان هەیە. ئەوەی پێویستمانە گەڕانەوەیە بۆ یاریکردن بە تۆپ، چونکە ئەمە هەمیشە خاڵی بەهێزی ئێمە بووە. پێویستمانە دووبارە ئەو یاریزانانە ببینینەوە کە زۆر شتیان پێ بەخشیووین.

پەیام

چێژ لەم ساتە وەربگرن، ئەمە شتێکە کە شایەنی شانازی پێوەکردنە. تاوەکوو دوایین چرکە هەموو شتێک پێشکەش دەکەین، ئێمە لێرەین چونکە خاوەنی کولتوورێکین کە هیچ کاتێک کۆڵ نادات و چونکە تۆپی پێیەکی باشمان پێشکەش کردووە.

دۆخی جەستەیی

کاتێک لە یاریی پێشکۆتایی مۆندیال دەبیت، ماندوییەتی هەندێک جار دەبێتە بابەتێکی لاوەکی. هەمووان باشن، بەڵام ئەمە لەو جۆرە یارییانەیە کە نابێت هیچ یاریزانێک بە کێشەی جەستەییەوە بچێتە نێو یاریگا.