ئایینەکەم رێنوێنیم دەکات؛ جێد سپێنس هۆکاری تەوقەنەکردن لەگەڵ تۆماس پارتی ئاشکرا دەکات

یاریگا –

یاریی نێوان هەڵبژاردەی ئینگلتەرا و هەڵبژاردەی گانا لە یاریگای جیڵێت، مشتومڕی نایەوە پێش ئەوەی یارییەکە تەنانەت دەست پێ بکات.

لەکاتی تەوقەکردنی پێش یارییەکەدا، وا دیار بوو جێد سپێنس بە ئەنقەست خۆی لە تەوقەکردن لەگەڵ تۆماس پارتی بەدوور دەگرێت. ئەم ساتە بە خێرایی لە تۆڕە کۆمەڵایەتییەکاندا بڵاوبووەوە، بەتایبەتی دوای ئەو هەواڵانەی دوایی کە باس لەوە دەکەن پارتی رووبەڕووی تۆمەتی تاوانکاری بووەتەوە و خۆی بە بێتاوان زانیوە.

دواتر سپێنس روونکردنەوەی لەسەر کارەکەیدا و گوتی:

من باوەڕی خۆمم هەیە و بەگوێرەی ئەوان دەژیم. باوەڕەکەم رێنوێنیی بڕیارەکانم دەکات و دەزانم نووسراوە پیرۆزەکانم و ئایینەکەم چیم فێر دەکەن. خەڵک ئازادن لەوەی بە هەر شێوازێک کە بیانەوێت لێکدانەوە بۆ رووداوەکە بکەن، بەڵام من ناچمە نێو وردەکارییەکانەوە یان روونکردنەوەی زیاتر بدەم. بۆ هاندەرانی ئینگلتەرا، ئەگەر کارەکەم بووەتە هۆی نائومێدکردن یان دڵگرانیی هەر یەکێک لە ئێوە، لە دڵەوە داوای لێبووردن دەکەم. ئەوە هەرگیز مەبەستی من نەبووە. من رێز لە هەمووان دەگرم، بەڵام هاوكات دەبێت بۆ بنەماکانی خۆم بە راست بمێنمەوە.

ئەم رووداوە رای جیاوازی لەنێو جیهانی تۆپی پێدا دروستکرد. یاریزانی پێشووی فەڕەنسا، پاتریس ئێڤرا بە توندی رەخنەی لە کارەکەی سپێنس گرت و گوتی:

خەڵکی ستایشی جێد سپێنس دەکەن بۆ رەتکردنەوەی تەوقەکردن لەگەڵ تۆماس پارتی، بەڵام من پێم وایە ئەمە رەفتارێکی بێڕێزانەیە. ئەگەر کێشەت لەگەڵ کەسێکدا هەیە، بە تایبەتی چارەسەری بکە لەبری ئەوەی نمایش بۆ تۆڕە کۆمەڵایەتییەکان بکەیت. وەکوو پیاوێکی رەشپێست، من ئەمە بە نائومێدکەر دەبینم.

دڵی بەرگریی پێشووی ئینگلتەرا ریۆ فێردیناندیش پرسیاری لەسەر ئەم رەفتارە دروستکرد، جەختی لەسەر بنەمای رێوشوێنی یاسایی دادپەروەرانە کردەوە و گوتی:

هەموو کەسێک مافی خۆیەتی رای خۆی هەبێت، بەڵام یەک بنەما هەمیشە دەبێت بمێنێتەوە: خەڵکی بە بێتاوان دادەنرێن تاوەکوو تاوانەکەیان لە دادگادا دەسەلمێنرێت. ئەمە بنەمای دادپەروەرییە.

Died Spence of England avoids shaking hands with Thomas Partey

Trip to USA powered by Adansi Travels#3Sports #Mundial26OnMG pic.twitter.com/ZnswJIcpAX

— #3Sports (@3SportsGh) June 23, 2026

لەلایەن خۆیەوە، پارتی هەوڵیدا بایەخی مشتومڕەکە کەم بکاتەوە. لە نامەیەکی کراوەدا کە ئاراستەی هاندەرانی کردبوو، ئەو ئاماژەی بە رووداوەکە کرد بەبێ ئەوەی راستەوخۆ رەخنە لە سپێنس بگرێت. ناوەڕاستکارەکەی گانا نوسیوویەتی کە ئەو سەرنجی ژاوەژاوە و “بێدەنگیی ئەو یاریزانەی داوە کە بڕیاریدا تەوقەم لەگەڵ نەکات”، بەڵام جەختی لەوە کردەوە کە هاوکات پاڵپشتیی هاوتیمەکان، رکابەرەکان و هاندەرانی گانای لە سەرانسەری جیهاندا هەست پێکردووە.

پارتی سوپاسی خێزان و هاندەرانی کرد بۆ وەستانەوە لەپاڵیدا لەماوەی قۆناخێکی سەختدا و دووبارە جەختی کردەوە کە ئەو خۆی بە بێتاوان زانیوە بەرامبەر ئەو تۆمەتانەی ئاراستەی کراون. ئەو رایگەیاند کە بڕوای بە بێتاوانیی خۆی هەیە و متمانەی بە پرۆسەی یاسایی هەیە بۆ دیاریکردنی راستییەکان. ناوەڕاستکارەکە کۆتایی بە قسەکانی هێنا بە هاندانی گەنجان بۆ کۆڵنەدان لە کاتی سەختییەکاندا و گوتی:

ژیان تاقیت دەکاتەوە. فیکەی ناڕەزایەتی، گومان و دەرگا داخراوەکان دەبن. بەڵام بەردەوامبە لە راکردن. بەردەوامبە لە بڕوابوون. ئاڵاکەت بە شانازییەوە هەڵگرە. خەونی گەورەت هەبێت تەنانەت کاتێک جیهان دەڵێت نەخێر.

ئەم رووداوە بووەتە هۆی دروستبوونی مشتومڕ سەبارەت بە بڕوا کەسییەکان، رەفتارە گشتییەکان و هاوسەنگیی لەنێوان باوەڕە تاکەکەسییەکان و ئەو بنەمایەی کە دەڵێت بابەتە یاساییەکان پێویستە لەلایەن دادگاکانەوە یەکلا بکرێنەوە نەوەکوو رای گشتی.