نابێت لەسەر زەوی بێت؛ فیفا لەسەر داوای سعوودییە پڕۆتۆکۆڵی خۆی دەگۆڕێت

یاریگا –

لە کاتی رێوڕەسمی پێش یاریی نێوان سعوودییە و ئوروگوای، فیفا پڕۆتۆکۆڵی توندی ئاڵای نیشتمانیی سعوودییەی جێبەجێ کرد.

لە گەڕی یەکەمی قۆناخی کۆمەڵەکانی جامی جیهانیی 2026، ئوروگوای و سعوودییە رووبەڕووی یەکدی بوونەوە، هەردوولا بە گۆڵێک یەکسان بوون و خاڵەکانیان دابەشکرد. لە پڕۆتۆکۆڵی رێوڕەسمی پێش یارییەکە، ئاڵا زەبەلاحەکەی سعوودیە لەلایەن خۆبەخشەکانەوە بە بەرزی راگیرا و نەهێڵدرا بەر چیمەنی یاریگاکە بکەوێت.

بۆچی ئەم جیاوازییە کرا؟

ئاڵای سعوودییە شایەتمانی تێدایە (کەلیمەی تەیبە/راگەیاندنی باوەڕ: لا إله إلا الله محمد رسول الله). یاسای سعوودیە قەدەخەی دەکات ئاڵاکە بەر زەوی بکەوێت، بخرێتە نێو ئاو، یان بە سەرەوخواری نیشان بدرێت، چونکە ئەمە وەکوو بێڕێزییەک بەرامبەر بە دەقە پیرۆزەکە سەیر دەکرێت.

ئەمە نەریتێکی دێرینی سعوودیەیە هاوشێوەی چۆنییەتی مامەڵەکردنی هەندێک وڵاتی دیکە لەگەڵ ئەو ئاڵایانەی نوسینی ئاینییان لەسەرە و فیفا لەم رێوڕەسمەدا بە تەواوی رێزی لەم تایبەتمەندێتییە گرت. چەندین سەرچاوە، لەوانەش دیمەنەکانی پەخشی تەلەفزیۆنی، پۆستی هاندەران و راپۆرتەکانی میدیا، ئەم جیاوازییەیان لە شێوازی مامەڵەکردن لەگەڵ هەردوو ئاڵاکەدا پشتڕاستکردووەتەوە.