یاریگا جێدەهێڵین؛ ئێران هەڕەشە لە فیفا دەکات

یاریگا –

ئێران هەڕەشەی جێهێشتنی یارییەکانی مۆندیال دەکات ئەگەر خۆپیشاندان لە دژی وڵاتەکە ئەنجام بدرێت.

وەزیری وەرزشیی ئێران، ئەحمەد دونیامالی، هۆشداریدا تیمی نیشتمانی ئێران، کە کێبڕکێ لە مۆندیالی رێکخراو لە لایەن ویلایەتە یەکگرتووەکان، مەکسیک و کەنەدا دەکات، یارییەکانی مۆندیال جێدەهێڵێت ئەگەر خۆپیشاندان لە دژی سەرکردەکانی ئەو وڵاتە ئاسیاییە لەنێو یاریگادا رووبدات.

دونیامالی لە لێدوانێکدا کە لە لایەن ماڵپەڕی وەرزشیی Varzesh3 بڵاوکراوەتەوە، گوتی:

ئێمە فیفامان ئاگادار کردووەتەوە کە بەرپرسانی تیمەکە یارییەکە جێدەهێڵن هەر کاتێک دروشمی سیاسی لەنێو یاریگاکاندا ببیستین.

راپۆرتەکە زانیاری زیاتری زیاد کردووە کە بە بەردەوامی داوا لە فیفا کراوە دڵنیا بێتەوە لەوەی هاندەران تەنیا ئاڵای فەرمی وڵاتەکە بهێننە نێو یاریگاکانەوە نەوەکوو ئاڵای کۆنی فارسی.

ئاڵا کۆنەکە کە شێر و خۆری تێدایە، بە تایبەتی لە لایەن گرووپەکانی ئۆپۆزسیۆنی شاهانەیی پێشوازی لێدەکرێت و لە خۆپیشاندانەکانی دەرەوەی وڵاتدا وەکوو هێمایەک بۆ دژایەتیکردنی سیستەمی ئیسلامیی ئێران بەکاردێت.

دوو یاری لە کۆی سێ یاریی قۆناخی کۆمەڵەکانی ئێران، لە رۆژی دووشەممە لە بەرامبەر نیوزیلاند و لە 21ـی حوزەیران لە بەرامبەر بەلجیکا، لە لۆس ئانجلس بەڕێوەدەچێت، کە بەشی زۆرینە لەو دوو ملیۆن ئێرانییەی لە ویلایەتە یەکگرتووەکان دەژین لەوێ نیشتەجێن.

بەشداریکردنی تیمەکە لە مۆندیالدا کەوتووەتە ژێر سێبەری ئەو ململانێ سەربازییەی لە شووباتی رابردوودا لەنێوان ئێران و ویلایەتە یەکگرتووەکان دەستیپێکرد. لەبەر ئەوە، ئێران بنکەی مەشقەکانی خۆی لە ئاریزۆناوە بۆ شاری تیجوانای مەکسیکی گواستەوە و تیمەکە تەنیا لە رۆژانی یارییەکاندا گەشت بۆ ویلایەتە یەکگرتووەکان دەکات بۆ کردنی یارییەکانی لەوێ.