تەنیا یەک گومان هەیە؛ پێکهاتەی سەرەکی ئیسپانیا لە ئێستاوە یەکلایی دەکرێتەوە

یاریگا –

پێکهاتەی سەرەکیی ئیسپانیا بۆ یاریی کردنەوەی مۆندیال لە بەرامبەر کەیپ ڤێردی لە ئاتڵانتا لە 15ـی حوزەیراندا تاوەکوو ئەم دووشەممەیە تەنیا لای لویس دێلا فوێنتێ زانراو بوو.

راهێنەری هەڵبژاردەی ئیسپانیا لە دوایین یاریی دۆستانەدا لە بەرامبەر پێرو پلانەکانی خۆی ئاشکرا کرد. بەگوێرەی رۆژنامەی ئاس، تەنیا یەک گومان لە باڵی چەپدا هەیە، بەڵام بایێنا، کە لە هەر سێ یاریی رابردوودا کە کردبووی سەرەکی بوو، بەربژێری سەرەکییە. راهێنەرەکەی شاری هارۆ چەندین هەفتە بوو پێداگری لەسەر ئەوە دەکرد کە لە ئێستاوە بڕیاری خۆی داوە، بەڵام هەرگیز بەو روونییەی یارییە دۆستانەکەی بەرامبەر پیرۆ نیازی خۆی ئاشکرا نەکردبوو، کە تێیدا نزیکەی سەرجەم گومانەکان یەکلابوونەوە.

ئونای سیمۆن، وەکوو چاوەڕوان دەکرا، بۆ چوارەم پاڵەوانییەتی گەورەی یەکبەدوایەک گۆڵپارێزی سەرەکی دەبێت. ئەو دوای رۆیشتنی دەیڤد دێ خیا لە دوای مۆندیالی رووسیا، بوو بە گۆڵپارێزی یەکەمی ئیسپانیا لە پاڵەوانییەتی جامی نەتەوەکانی ئەورووپا کە دواخرابوو و لەو کاتەوە پارێزگاری لەو پێگەیە کردووە. سیمۆن وەکوو ژمارە یەکی ئیسپانیا دووەمین مۆندیالی خۆی دەکات، ئەگەرچی درێسی ژمارە 23 دەپۆشێت.

لە هێڵی بەرگریدا پێگەکان روون دیارن. مارکۆس یۆرێنتێ ئاستێکی نایابی لە بەرامبەر پێرو نیشاندا؛ هاوکات کوبارسی ئەو پاسەی پێشکەش کرد کە بووە هۆی گۆڵی 1-0. لاپۆرت دەبێتە سەرکردەی هێڵی دواوە، رێک وەکوو پاڵەوانییەتی یۆرۆدا، لە کاتێکدا گیانی رکابەریی کوکورێیا بووەتە یەکێک لە نیشانە تایبەتەکانی تیمی نیشتمانی.

هێڵی ناوەندیش بە هەمان شێوە جێگیر دیارە، بە بوونی رۆدری، فابیان و پێدری ئەو سیانەیەیان پێکهێنابوو کە لە ماوەی یۆرۆدا دەستلێنەدراو بوون، تاوەکوو یاریزانە کەنارییەکە لە یاریگای نێکارستادیۆنی شتوتگارت دوای لێدانەکەی تۆنی کرووس تووشی پێکان بوو.

پێدەچێت دێلا فوێنتێ کەمێک شوێنی یاریزانانی هێڵی ناوەندی گۆڕیبێت بۆ ئەوەی پێدری زیاتر لە رابردوو بەریەککەوتنی لەگەڵ تۆپدا هەبێت، چونکە پێشتر راهێنەرەکە زۆرجار ئەوی زیاتر لە هێڵی پێشەوە دادەنا. ئەو رۆڵە جۆرێک لە بێزاریی بۆ پێدری دروست کردبوو، چونکە خۆی لە ناوچەی سزاوە نزیک دەبینییەوە لەبری ئەوەی لە بنیادنانی یاری لە قووڵایی یاریگاوە بەشداربێت.

پێدری حەز دەکات بەشێک بێت لە رووداوەکان و یارمەتی بنیادنانی هێرشەکان بدات. دواتر، وەکوو چۆن لە جووڵەی گۆڵی 2-0 لە بەرامبەر پێرو روویدا، ئەو پێی باشترە بە شێوەیەکی چاوەڕواننەکراو بگاتە ناوچەکە لەبری ئەوەی چوونەنێو هێڵی سزا وەکوو پلانێکی جێگیر پەیڕەو بکات.

فێران تۆرێس لە دوو یاریی یەکەمی دۆستانەدا (گۆڵێک بەرامبەر عێراق و ئەسیستێک بۆ پێدری لە بەرامبەر پێرو) یاریزانی دیار بووە، لە کاتێکدا ئۆیارزابال بەردەوامە لە ریکۆردە سەرنجڕاکێشەکەی گۆڵکردن بۆ ئیسپانیا؛ 25 گۆڵ لە 53 بەشداریکردندا. لە شەش یاریی رابردووی خۆیدا هەشت گۆڵی کردووە، کە ئامارێکی سەرنجڕاکێشە.

تەنیا یەک پێگە هەیە کە هێشتا دەکرێت لە ماوەی هەفتەکەدا وابکات راهێنەرەکە بیر بکاتەوە. ئەویش پێگەی باڵی چەپە. بەهۆی بەردەست نەبوونی نیکۆ ویلیامس، بایێنا وەکوو بەربژێریی روون دەمێنێتەوە چونکە ئەمە چارەسەری دڵخوازی دێلا فوێنتێ بووە لەم وەرزەدا لە هەر کاتێکدا کە نیکۆ ئامادە نەبووبێت.

لە کۆی شەش یاریی رابردوو کە کردوویەتی، بایێنا لە پێنج یاریاندا بە شێوەی سەرەکی دەستی پێکردووە، کە هەموویان لە پێگەی باڵی چەپدا بوون؛ لە بەرامبەر بولگاریا، جۆرجیا، سێربیا، عێراق و پێرو. پەیامەکەی دێلا فوێنتێ روون دیارە؛ بەهێزکردنی بایێنا و نیشاندانی متمانە پێی بۆ ئەوەی خۆی هەست بە دڵنیایی بکات.

بژاردەی دیکە بوونیان هەیە، دیارترینیان ئۆلمۆیە، کە لە بەرامبەر پێرودا چالاک و پڕ جووڵە دیار بوو. هاوکات یێرێمی پینۆ لەنێو بژاردەکاندایە، بەڵام پێدەچێت چەند هەنگاوێک لە دوای یاریزانەکەی رۆکێتاسەوە بێت. ئەگەر هیچ سوپرایزێکی چاوەڕواننەکراو نەبێت، پێکهاتەی سەرەکی بۆ یاریی کردنەوەی مۆندیال لە بەرامبەر کەیپ ڤێردی لە ئێستاوە بڕیاری لەسەر دراوە.