جێگەی داخە؛ سۆماڵ بەهۆی ناوبژیوانەکەوە رەخنەی توند لە ئەمریکا دەگرێت

یاریگا –

سۆماڵ بە توندی رەخنە لە ویلایەتە یەکگرتووەکانی ئەمریکا دەگرێت بەهۆی رێگریکردن لە چوونی باشترین ناوبژیوانی ئەفریقا بۆ وڵاتەکە.

حکومەتی سۆماڵ رۆژی سێشەممە رایگەیاند کە بڕیاری بەرپرسانی کۆچی ویلایەتە یەکگرتووەکان بۆ رێگریکردن لە چوونی عومەر عەبدولقادر ئارتان بۆ وڵاتەکە، کە بڕیاربوو ببێتە یەکەم ناوبژیوانی سۆماڵی لە مێژووی مۆندیالدا ناوبژیوانی یارییەک بکات، جێگەی داخە و داوای روونکردنەوەی هەم واشنتن و هەم فیفاشی کرد.

لە بەیاننامەیەکدا، وەزارەتی وەرزش و لاوانی سۆماڵ رایگەیاند کە لەگەڵ وەزارەتی پەیوەندییە نێودەوڵەتییەکان، هەوڵی دپلۆماسی دەدەن و لەگەڵ دەسەڵاتدارانی پەیوەندیداری ئەمریکا و فیفا لە پەیوەندیدان بۆ بەدەستهێنانی روونکردنەوەیەکی روون سەبارەت بەم بابەتە. وەزارەتەکە لە بەیاننامەکەیدا دەڵێت:

جێگەی داخە کە پێدەچێت مامەڵەیەکی لەو شێوەیە روویدابێت و وەزارەت بە وردی چاودێریی دۆخەکە دەکات.

حوکوومەتی سۆماڵ جەختی لەوە کردەوە کە ئارتان بە سەرکەوتوویی نوێنەرایەتی وڵاتەکەی، پیشەکەی و وەرزشی سۆماڵی کردووە. هاوکات ئاماژەی بەوەش کرد کە بەشداریکردنی لەسەر ئاستی نێودەوڵەتی سەرچاوەی شانازی و شەرەفە بۆ سەرجەم سۆماڵییەکان و رەنگدانەوەی ئەو پێشکەوتن و دەستکەوتە ئەرێنییانەیە، کە لەلایەن وەرزشوانان و بەرپرسانی وەرزشیی سۆماڵەوە لەسەر شانۆی جیهانی بەدەست دێن.
لە بەیاننامەیەکی تایبەت بە خۆیدا، ناوبژیوانەکە سوپاسگوزاری خۆی بۆ خێزانی تۆپی پێ بەهۆی پەیامەکانیانەوە دەربڕی و هیوای سەرکەوتنی گەورەی بۆ هاوکارانی لە مۆندیالدا خواست. ئارتان لە بەیاننامەکەدا دەڵیت:

سەرەڕای بارودۆخەکە، من بە ئەرێنی دەمێنمەوە و سەرنجم لەسەر ئاڵەنگارییەکانی داهاتووی کاروانی ناوبژیوانیی خۆم دەبێت. دەمەوێت سوپاسی فیفا و فیدراسیۆنی تۆپی پێی ئەفریقی بکەم بۆ سەرجەم پاڵپشتییەکانیان و پابەند دەمێنم بە پاراستنی ئاستی ناوبژیوانیی خۆم لە کاتێکدا سەرنجم لەسەر داهاتووە.

گوتەبێژی دەستەی گومرک و پاراستنی سنوورەکانی ویلایەتە یەکگرتووەکان (CBP) رایگەیاند، کە ناوبژیوانە سۆماڵییەکە بەهۆی کێشە لە پرۆسەی وردبینی پێشینەدا بە نەشیاو بۆ چوونەنێو وڵات بینراوە و رێگەی پێ نەدراوە بچێتە وڵاتەکەوە، ئەمەش دوای ئەوەی لە 6ـی حوزەیراندا لە رێگەی گەشتێکی ئاسمانی لە ئیستەنبوڵەوە گەیشتە فڕۆکەخانەی نێودەوڵەتیی میامی.

ئارتان، کە وەکوو باشترین ناوبژیوانی پیاوانی فیدراسیۆنی تۆپی پێی ئەفریقی بۆ ساڵی 2025 دەستنیشانکرابوو، بڕیاربوو ببێتە یەکەم ناوبژیوانی سۆماڵی کە لە مێژووی مۆندیالدا ناوبژیوانی یارییەک بکات. فیفا هاوکات رۆژی دووشەممە بەیاننامەیەکی دەرکرد و تێیدا روونیکردەوە کە ئەو رێکخراوەی بەرپرسە لە مۆندیال، بەشداریی لە پرۆسەکانی کۆچی وڵاتی خانەخوێدا ناکات، لەوانەش پێدانی ڤیزا.

سۆماڵ، کە وڵاتێکە بەدەست توندوتیژیی جیهادییەکانەوە دەناڵێنێت، لەنێو ئەو وڵاتانەدایە کە هاوڵاتییانیان کەوتوونەتە ژێر خشتەی خستنەڕووی قەدەخەکردنی گەشتکردنی ئەمریکا کە لەلایەن کارگێریی سەرۆک دۆناڵد ترەمپەوە سەپێندراوە، لەپاڵ نەتەوەکانی دیکەی وەکوو ئەفغانستان، لیبیا، ئێران و یەمەن.

مۆندیال لە یاریگاکانی سەرانسەری ویلایەتە یەکگرتووەکان، مەکسیک و کەنەدا بەڕێوەدەچێت و لە 11ـی حوزەیراندا بە یەکەم یاریی نێوان مەکسیک و ئەفریقای باشوور لە یاریگای ئازتێکا، کە یارییەکی کۆمەڵەی Aـیە، دەستپێدەکات.

بڕیارێکی شۆکهێنەر؛ ئەمریکا رێگەی نەدا باشترین ناوبژیوانی ئەفریقا بەشداریی مۆندیال بکات