بایرن میونشن هەوڵی گواستنەوەی ئەستێرەیەکی مەغریبی دەدات

یاریگا –

یانەی بایرن میونشنی ئەڵمانی ئامادەکارییەکانی بۆ بازاڕی گواستنەوەی هاوینەی ساڵی 2026 دەستپێکردووە و چاوی بڕیوەتە گواستنەوەی ئیسماعیل سایبەری، ناوەڕاستکاری مەغریبی تەمەن 25 ساڵ، کە ئێستا لە ریزەکانی یانەی ئایندهۆڤنی هۆڵەندی دەدرەوشێتەوە.

دوای پێشکەشکردنی وەرزێکی ناوازە لە خولی هۆڵەندی، کە تێیدا توانیویەتی 14 گۆڵ و 8 ئەسیست لە 25 یارییدا بکات، بە کۆی گشتی 18 گۆڵ لە سەرجەم پاڵەوانییەتییەکاندا، یاریسازی پاڵەوانی هۆڵەندا سەرنجی چەندین یانەی گەورەی ئەوروپای راکێشاوە.

بەگوێرەی راپۆرتێکی میدیای De Telegraafـی هۆڵەندی، لایەنی باڤاری لە نزیکەوە چاودێریی نمایشە سەرنجڕاکێشەکانی ئیسماعیل سایبەری دەکات. ناوبراو لەم دواییانەدا لە یاریی بەرامبەر ئۆترێخت ئاستێکی باڵای نیشاندا، کاتێک توانی دوو گۆڵ و ئەسیستێک بکات و خەڵاتی باشترین یاریزانی یارییەکە بەدەستبهێنێت.

سایبەری تاوەکوو ساڵی 2029 گرێبەستی لەگەڵ ئایندهۆڤندا هەیە، بەڵام بەهای بازاڕییەکەی بە شێوەیەکی خێرا روو لە بەرزبوونەوەیە: لە سەرەتادا بە 32 ملیۆن یۆرۆ دەخەمڵێندرا، ئێستا نرخەکەی بۆ نێوان 40 تاوەکوو 50 ملیۆن یۆرۆ بەرزبووەتەوە. بەگوتەی پیتەر بۆشی راهێنەری تیمەکە، نرخەکەی دەکرێت بگاتە 60 ملیۆن یۆرۆ و یانەکەش چاوەڕوان ناکرێت بە ئاسانی دەستبەرداری ئەم گەوهەرە بێت.

ئەم یاریزانە مەغریبییە دوای بەدەستهێنانی نازناوی خولی هۆڵەندی، ئامادەیە بۆ هەنگاوێکی گەورەی دیکە لە کاروانی پیشەگەریی خۆیدا بنێت و دەیەوێت پەیوەندی بە یانەیەکی مەزنی وەکوو بایرن میونشنەوە بکات. لە لایەکی دیکەوە، بایرن میونشن تەنیا نییە لەم قۆناخەدا، چونکە یانەکانی پاریس سانجێرمان و ئەیسی میلانیش ئارەزووی خۆیان بۆ گواستنەوەی نیشانداوە.

ئەگەر ئەم گرێبەستە سەرکەوتووانە کۆتایی بێت، ئیسماعیل سایبەری دەبێتە یەکەم یاریزانی مەغریبی لە مێژووی بایرن میونشن دا. ئەمەش پێکهاتەی تیمەکە زیاتر بەهێز دەکات، کە پێشتر لە ساڵی 2025 بە گرێبەستەکەی لویس دیاز بە بڕی 70 ملیۆن یۆرۆ پاڵپشتی کرابوو.

له‌ژێر سه‌رپه‌رشتی ڤینسێنت کۆمپانی، بایرن میونشن بۆ وەرزی نوێ چاوی بڕیوەتە بەدەستهێنانی نازناوەکانی چامپیۆنزلیگ و بۆندسلیگا. سایبەری کە یاریزانێکی گشتگیرە و وەکوو باڵی راستی هێرشبەریش بە باڵای 1.85 مەتر یاری دەکات، بە تەواوی لەگەڵ ئەو پڕۆفایلەدا دەگونجێت کە کۆمپانی دەیەوێت بۆ هێنانەدی چالاکی و خێرایی لە هێڵی هێرشبەری تیمەکەیدا.