یاریگا –
رادیۆی کاتالوونیایی RAC 1 تۆمارێکی نهێنیی فلۆرێنتینۆ پێرێزی ساڵی 2019ـی بڵاوکردووەتەوە، کە تێیدا سەرۆکی ریال مەدرید بانگەشەی ئەوە دەکات پیلانگێڕییەک دژی هەبووە.
ئەم دەنگە لەو گەواهیدانە وەرگیراوە کە لەبەردەم دادگای نیشتمانیی ئیسپانیادا وەکوو بەشێک لە کەیسی پەیوەندیدار بە ئیگناسیۆ سانچێز گالان، سەرۆکی جێبەجێکاری کۆمپانیای ئیبێردۆلا پێشکەشی کردبوو. ئەم ئاشکراکردنە لە سەرەتای هەفتەیەکی یەکلاکەرەوەدا دێت بۆ ریال مەدرید، پێش یەکەم هەڵبژاردنی سەرۆکایەتیی یانەکە لە دوای ساڵی 2006ـەوە.
تۆمەتەکان دژی سانچێز گالان
بەگوێرەی تۆمارەکە، کە لە لێدوانەکەی پێرێز لە 14ـی تشرینی دووەمی 2019 لەبەردەم دادوەر مانوێل گارسیا کاستێیۆن وەرگیراوە، سەرۆکی ریال مەدرید، سانچێز گالانی تۆمەتبار کردووە بەوەی خۆسێ مانوێل ڤیارێخۆی کۆمیساری پێشووی پۆلیسی بەکرێ گرتووە بۆ سیخوڕیکردن بەسەرییەوە و دزەپێکردنی زانیاریی زیانبەخش بۆ نێو میدیاکان.
پێرێز بانگەشەی ئەوەی کردووە سانچێز گالان، کە مێژوویەکی درێژی لە رکابەریی بازرگانی لەگەڵیدا هەیە، لەگەڵ ڤیارێخۆ پیلانیان گێڕاوە بۆ دوورخستنەوەی لە رێگەی سێ شێوازەوە:
کوشتنی لە رێگەی “رووداوێک” یان “ڤایرۆسێک”ـەوە.
دۆزینەوە و ئاشکراکردنی هەژمارە بانکییە کە گوایە لە پەناگە باجییەکاندا لە دەرەوەی ئیسپانیا هەیەتی.
دروستکردنی منداڵێکی ناشەرعی بۆی.
گەواهیدانەکەی فلۆرێنتینۆ
لە تۆمارە دەنگییەکەدا، پێرێز رایگەیاندووە:
سێ شت هەن کە ئەوان بەردەوام بە منیان گوتووەتەوە. یەکێکیان ئەوەیە کە باشترین شت ئەوەیە لە رێگەی رووداوێک یان ڤایرۆسێکەوە بمفەوتێنن. من نەم دەزانی دەتوانیت کەسێک بە ڤایرۆس بفەوتێنیت! شتێکی دیکە کە دەیڵێن ئەوەیە کە دەبێت ئەو هەژمارانە بدۆزنەوە کە فلۆرێنتینۆ پێرێز لە دەرەوەی ئیسپانیا هەیەتی و پارەیەکی زۆریش بۆ ئەوە دەدەن. سێیەمین شتیش، کە زۆر بێمانایە، ئەوەیە منداڵێکم بۆ دروست بکەن.
بەگوێرەی RAC 1، گەواهیدانەکەی پێرێز نزیکەی کاتژمێرێکی خایاندووە وەکوو بەشێک لەو رێکارانەی کە لەو کاتەدا لە ژێر نهێنیی دادوەرییدا پارێزراو بوون.
رەخنەگرتن لە میدیاکان
لە کاتی لێدوانەکەیدا، پێرێز رەخنەی لە هەندێک رۆژنامەنووس گرت و بانگەشەی ئەوەی کرد کە ڤیارێخۆ و ئەندامانی راگەیاندن بەنیاز بوون زانیارییەکان دژی ئەو وەکوو جۆرێک لە هەڕەشەکردن بەکاربهێنن.
ئەو بانگەشەی ئەوەی کرد کە دۆخەکە گەیشتووەتە ئاستێکی هێندە جدی کە داوای یارمەتیی لە فێلیکس سانز رۆڵدان کردووە، کە لەو کاتەدا بەڕێوەبەری سەنتەری هەواڵگریی نیشتمانیی ئیسپانیا CNI بووە. پێرێز گوتی: “ئەو پێی گوتم زۆر نیگەران نەبم.”
🗣️ ÀUDIO SECRET – Florentino Pérez va denunciar al CNI que el seu gran rival s’havia conxorxat amb Villarejo per assassinar-lo “amb un virus o un accident”
➡️ MÉS INFO: https://t.co/JsV37CGAGl pic.twitter.com/3RTef4WHMd
— El món a RAC1 (@elmonarac1) June 1, 2026
ناوەڕۆکێکی سیاسی لە دەوری هەڵبژاردندا
بڵاوبوونەوەی ئەم دەنگە لە ناوەڕاستی هەڵمەتی هەڵبژاردنی سەرۆکایەتیی ریال مەدریددا دێت.
لەو دواییانەدا، دوای راگەیاندنی هەڵبژاردنەکان بەهۆی وەرزی بێ نازناوی تیمەکە، پێرێز ئاماژەی بەوە کرد کە دەکرێت سانچێز گالان پەیوەندیدار بێت بە بەربژێریی ئێنریکێ ریکێلمی، کە تەنیا رکابەری ئەوە لەو هەڵبژاردنەی بڕیارە لە 7ـی حوزەیراندا بەڕێوە بچێت.
ئەم دەنگە جارێکی دیکە سەرنجەکانی راکێشایەوە سەر ناکۆکییەک کە لە تۆپی پێ تێپەڕ دەکات و هەندێک لە کاریگەرترین کەسایەتییەکانی ئیسپانیا لە بواری بازرگانی، سیاسەت و میدیادا دەگرێتەوە.
