لە دوژمنەوە بۆ رزگارکەری بێرنابیۆ؛ چیرۆکی نزیکبوونەوەی رۆدری لە ریال مەدرید

یاریگا –

رۆیشتنی چاوەڕوانکراوی پێپ گواردیۆلا لە مانچێستەر سیتی، تەنیا کۆتاییهێنان نییە بە سەردەمێکی زێڕین لە ئینگلتەرا، بەڵکوو گۆڕینی تەواوی نەخشەی گواستنەوەکانی ئەوروپایە و ئەگەر گۆڕانکارییەکی خێرا و کتوپڕ روونەدات، ماڵئاوایی پێپ ئەو دەرگایە دەکاتەوە کە ساڵانێکە بە تەواوی بەڕووی ریال مەدریددا داخرابوو؛ گواستنەوەی رۆدری هێرناندێز.

هەڵوەشانەوەی گرێبەستە رۆحییەکەی پێپ و رۆدری
بۆ ماوەیەکی درێژ، رۆدری وەکوو خەونێکی ئەستەم بۆ ئۆفیسەکانی ڤاڵدێبێباس سەیر دەکرا. چارەنووسی ئەستێرە 29 ساڵانییەکە بە تەواوی بە پێپ گواردیۆلاوە گرێدرابوو. پەیوەندی نێوان ئەم دووانە لەسەر بنەمای رێزی هاوبەش و تێگەیشتنێکی هاوشێوە بوو بۆ تۆپی پێ؛ بێدەنگی لە دەرەوەی یاریگا، سەرکردایەتی، و لایەنی تەکتیکی. بۆیە مانەوەی پێپ، واتای مانەوەی دڵنیایی رۆدری بوو.

بەگوێرەی زانیارییەکانی رۆژنامەی مارکا، ئێستا ئەو هاوکێشەیە گۆڕاوە؛ هەم سیتی و هەم پێپ دەیانزانی کە لە کۆتاییدا سۆز و خێزان دەکرێت کار لە بڕیاری یاریزانێکی ئیسپانی بکات بۆ گەڕانەوە بۆ نیشتیمان. بە رۆیشتنی مامۆستاکەی، ئێستا بیرۆکەی گەڕانەوە بۆ ئیسپانیا لە مێشکی رۆدریدا گەورەتر دەبێت.

🚨 Rodri, loco por venir: la marcha de Pep Guardiola, salvo giro radical de última hora, abre una puerta que durante años permaneció completamente cerrada para el Madrid

✍🏼 @jdelriomuradas https://t.co/xlgXiUuU2v

— MARCA (@marca) May 19, 2026

چارەسەری کۆتایی بۆ برینەکەی بێرنابیۆ
لە دوای وازهێنانی تۆنی کرووس و کۆتایی سێگۆشە مێژووییەکەی [کرووس، مۆدریچ، کاسێمێرۆ]، ریال مەدرید بەدەست کەلێنێکی گەورەوە دەناڵێنێت. نەبوونی باڵانسی تەکتیکی، لاوازیی بەرگری و خاوی لە بنیاتنانی هێرشەکاندا، بوونەتە کێشەی سەرەکیی یانەکە. لێرەدا، رۆدری وەکوو فریادڕەس دەردەکەوێت.

بە باڵای زیاتر لە 1.90  مەتر، رۆدری هێزی جەستەیی، زیرەکیی تەکتیکی و توانایەکی بێوێنەی کۆنترۆڵکردنی تێکەڵکردووە.  لە دیاریکردنی کاتی گونجاو باشترینە، بڕینی تۆپ و زانینی ئەوەی کەی یارییەکە خێرا بکات و کەی هێواشی بکاتەوە. بە کورتی؛ خوێندنەوەی یاری، باڵانس، و کۆنترۆڵ؛ رێک ئەوەی کە مەدرید پێویستی پێیەتی.

ئاستەنگەکان و دیپلۆماسییەکەی پێرێز
گواستنەوەکە ئاسان نییە؛ رۆدری و گواردیۆلا هەردووکیان گرێبەستیان تاوەکوو ساڵی 2027 هەیە و سیتی بە ئاسانی دەستبەرداری گرنگترین یاریزانی نابێت. لە رابردووشدا کێشە لە نێوان ریال مەدرید و رۆدری هەبووە، بەتایبەت دوای رووداوەکانی ئاهەنگی باڵۆندۆر کە مەدرید بایکۆتی کرد، بەڵام فلۆرێنتینۆ پێرێز بە دیپلۆماسییەتی خۆی توانیویەتی گرژییەکان کەم بکاتەوە.