بڕیارێکی سەیر؛ بۆ مۆندیال ئینگلتەرا پەنا بۆ پسپۆڕانی خەو دەبات

کێشەی جێگەی خەوتن لە کانساس

بەگوێرەی راپۆرتێکی رۆژنامەی سەن، فیدراسیۆنی تۆپی پێی ئینگلتەرا رێکاری نائاسایی گرتووەتە بەر سەبارەت بە شوێنی مانەوەی شاندی هەڵبژاردەکە لە کانساس.

ئەم بڕیارە دوای ئەوە هات کە چەندین گلەیی و گازندە لەبارەی ئاستی ئاسوودەیی ئەو هۆتێلەی بۆ هەڵبژاردەکە دیاریکراوە، بەرزبووەوە.

راپۆرتەکان ئاماژە بەوە دەکەن کە پێشتر هەندێک لە میوانانی هۆتێلەکە باسیان لە ره‌قی جێگەی خەوتن (دۆشەک) و سەرینەکان کردووە، جگە لە خراپیی سیستمی دژە دەنگ لە ژوورەکاندا، کە دەنگی ژوورەکانی تەنیشت بە ئاسانی دەبیسترا. ئەمەش وەک فاکتەرێکی نەرێنی بینرا کە کاریگەری لەسەر ئارامی و کوالیتی خەوی یاریزانەکان دەبێت.

توخێل و پلانی خەوی شاهانە

لەسەر ئەم بنەمایە، دەستەی هونەری بە سەرۆکایەتی تۆماس توخێل، بڕیاری دا پەنا بۆ پسپۆڕانی زانستی خەو ببات، بە ئامانجی دەستەبەرکردنی باشترین جۆری حەسانەوە بۆ یاریزانەکان، بەتایبەت لە ژێر فشاری یارییەکان و گۆڕانی کاتەکاندا.

بەپێی پلانەکە، ژوورەکانی هۆتێله‌كه‌ بە تەواوی دووبارە نۆژەن دەکرێنەوە و ئامادە دەکرێن؛ بۆ هەر یاریزانێک سەرین و جێگەی خەوتنی تایبەت بە پێویستییە جەستەییەکانی خۆی دابین دەکرێت، لەگەڵ بەکارهێنانی جۆرە راخەرێکی تایبەت کە یارمەتیدەرە بۆ خەوێکی قووڵ.

کیسەی خەوی كه‌سی بۆ هەر یاریزانێک

هەروەها هەر یاریزانێک کیسەیەکی خەوی تایبەتی پێ دەدرێت، كه‌ کیتێکی تایبەتیی گەشتیارییە بۆ خەوتن کە پێکهاتوە لە دۆشەکی ئیسفەنجی تایبەت بۆ رێکخستنی رەقی جێگەی خەوتنەکە، لەگەڵ ئامێری تری هاوکار بۆ گونجاندن لەگەڵ بارودۆخی گەشتکردن و ماندوێتی.

ئەم پڕۆژەیە لەلایەن فیدراسیۆنی تۆپی پێی ئینگلتەرا و پەیمانگای وەرزشی بەریتانی جێبەجێ دەکرێت. ئەم هەنگاوە دەری دەخات کە لە پاڵەوانێتییەکی وەک مۆندیالدا، تەنانەت وردەکارییە بچووکەکانیش دەبنە هۆی دروستکردنی جیاوازی گەورە، بەتایبەت لە ژێر کاریگەریی گەرمای توند و شێی بەرزی هەندێک لە شارەکانی ئەمریکا.