یاریگا –
هانزی فلیک، راهێنەری یانەی بارسێلۆنا، کاردانەوەی خۆی لەسەر بڕیاری جێهێشتنی رۆبێرت لیڤاندۆڤسکی هێرشبەری پۆڵەندی نیشاندا و رایگەیاند کە کارکردن لەگەڵ ئەم یاریزانە هەمیشە شانازییەکی گەورە بووە.
نموونەیەک بۆ لاوان و کۆتا یاریی لە کامپ نۆو
فلیک لە کۆنگرە رۆژنامەوانییەکەیدا رایگەیاند؛
لیڤاندۆڤسکی نموونەیەکی باڵایە بۆ یاریزانە گەنجەکان. ئەو مرۆڤێکی ناوازە و یاریزانێکی گەورەیە، زۆر گرنگی بە تەندرووستیی خۆی دەدات، هەر لەبەر ئەوەشە تاوەکوو ئێستا لەم ئاستە بەرزەدا بەردەوامە.
راهێنەرە ئەڵمانییەکە ئاشکرایکرد کە لیڤا لە یارییەکەی سبەی بەرامبەر ریال بێتس بە شێوەی سەرەکی یاریی دەکات، چونکە بە تەواوی شایستەی ئەم جۆرە ماڵئاواییەیە.
پەیوەندییە مێژووییەکەی فلیک و لیڤا
فلیک بە سۆزەوە ئاماژەی بە رابردووی هاوبەشیان کرد و گوتی؛
من لەگەڵ تیپەکە و لەگەڵ رۆبێرت خۆیدا قسەم کردووە، ئەو کاتانێکی زۆر خۆشی لە بارسێلۆنا بەڕێکرد. تەنیا شتێک کە پێویستە بیڵێم ئەوەیە کە تەواوی نازناوەکانی ژیانی راهێنەرایەتیم لەگەڵ ئەو بووە. هەمیشە لە کاتە قورسەکاندا لەپشت تیپەکەوە بووە و من زۆر قەرزاری ئەوم.
قەیرانی جێگرەوە بۆ وەرزی داهاتوو
سەبارەت بەوەی بارسێلۆنا چۆن قەرەبووی رۆیشتنی ئەم ئەستێرەیە دەکاتەوە، فلیک دانی بە راستییەکی تاڵدا نا و گوتی؛
ئێمە دەتوانین پێکهاتەی تیپەکە رێکبخەینەوە، بەڵام دۆزینەوەی هێرشبەرێک لەم ئاستەدا کە هەمیشە گۆڵت بۆ بکات، کارێکی زۆر قورسە، لە ئێستاوە سەیری بازاڕی گواستنەوەکان دەکەین بەڵام هیچ شتێک تەواو نەبووە. بێگومان زۆر بیری دەکەین و دەبێت دۆخەکە بە باشی بەڕێوەبەرین.
