یاریگا –
ویسلی شنایدەر، ئەستێرەی پێشووی یانەکانی ریال مەدرید و ئینتەرمیلان، لە لێدوانێکی ئاگریندا هێرشێکی بێبەزەییانەی کردە سەر یانەی بارسێلۆنا و هاندەرانی، پێی وایە ئەو یانەیە تووشی داڕمانی پێوەرەکان بووە.
دابەزینی پێوەرەکان و بەراوردکارییە کۆمیدییەکان
شنایدەر لە دەستپێکی قسەکانیدا بۆ رۆژنامەی ئاس ئاماژەی بەو بەراوردانە کرد کە هاندەرانی بارسێلۆنا لە نێوان یاریزانە لاوەکانیان و ئەفسانەکاندا دەیکەن و گوتی؛
ئەوەی هاندەرانی بارسێلۆنا یاریزانێکی تەمەن 18 ساڵ بە کریستیانۆ رۆناڵدۆ بەراورد دەکەن تەنیا لەبەر بردنەوەی نازناوی خول، نیشانەی ئەوەیە پێوەرەکان لەنێو یانە تاوەکوو چ ئاستێک دابەزیون.
بەرگریکردن لە شکۆی کریستیانۆ رۆناڵدۆ
ئەو یاریزانە هۆڵەندییە پێی وایە مێژووی رۆناڵدۆ زۆر لەوە گەورەترە کە هاندەرانی بارسێلۆنا گاڵتەی پێ بکەن و دەڵێت؛
کریستیانۆ ماوەی 20 ساڵ باڵادەستی رەهای بەسەر خولەکانی ئینگلتەرا، ئیسپانیا، ئیتاڵیا و هەموو ئەوروپا هەبوو، پێویستە هاندەرانی بارسێلۆنا خەمی ئەوەیان بێت چۆن لە قۆناخی کۆمەڵەکانی چامپیۆنزلیگ تێپەڕن، نەک گاڵتە بە یەکێک لە مەزنترین یاریزانەکانی مێژوو بکەن.
10 ساڵ لە بێئومێدی و شکستی چامپیۆنزلیگ
شنایدەر بەردەوام بوو لە رەخنە توندەکانی و پەردەی لەسەر شکستی کاتالوونییەکان لە کیشوەرە پیرەکە لادا؛
بارسێلۆنا 10 ساڵە چامپیۆنزلیگی نەبردووەتەوە، هەموو دوو وەرز جارێکیان سووکایەتییەکان پێ دەکرێت بەڵام بە شێوەیەک ئاهەنگی نازناوی خول دەگێڕێت وەکوو ئەوەی تەواوی تۆپی پێی داگیرکردبێت.
ئەم لێدوانانەی شنایدەر لە کاتێکدایە کە بارسێلۆنا لە ناوخۆی ئیسپانیا ئەنجامەکانی باش بووە، بەڵام وەکوو شنایدەر ئاماژەی پێ دەدات، جیاوازییەکی گەورە لە نێوان سەرکەوتنی ناوخۆیی و گەڕانەوە بۆ لووتکەی ئەوروپا هەیە.
