پاڵەوانەکان بە DNAـی بارسێلۆنا و مۆرینیۆ؛ هەردوو راهێنەرەکە لەژێر کاریگەری گواردیۆلان

یاریگا –

لویس ئێنریکێ و میکێل ئارتێتا رابەرایەتیی یانەکانی پاریس سانجێرمان و ئارسناڵیان بەرەو یاریی کۆتایی خولی پاڵەوانەکانی ئەوروپایان کرد. هەردوو راهێنەرەکە خاوەن رەگ و ریشەیەکی بەهێزی بارسێلۆنان و ناویان بە تۆپی پێی هێرشبەری و کۆنتڕۆڵکردنی تۆپەوە بەستراوەتەوە.

لەگەڵ ئەوەشدا، ئەم یارییە پێشکۆتاییانە ئەوەشیان نیشاندا کە لە ئەورووپا، واقیعزانی بە هەمان ئەندازەی جوانیی یارییەکە گرنگە. پاریس وەکوو یارییەکانی دیکە سەرنجڕاکێش نەبوو، بەڵام وەکوو تیمێک هێشتا رکابەر، خاوەن بنەما و تۆکمە بوون. ئارسناڵیش بە هێزی بەرگری و توانای بەرگەگرتنی فشار لە کاتی پێویستدا درەوشایەوە.

هەرچەندە هەردوو راهێنەرەکە بە ستایلی بارساوە بەستراونەتەوە و لەژێر کاریگەری پێپ گواردیۆلا دان، بەڵام چامپیۆنزلیگ زۆر زیاتر لە تۆپی پێیەکی جوان داوا دەکات. شەوانێک هەن کە بەرگریکردنێکی باش، کۆنتڕۆڵکردنی ساتە یەکلاکەرەوەکان و رکابەریکردنی ژیرانە بە هەمان ئەندازەی داهێنان گرنگن.

گێمی دووەمی پاریس لە میونشن و هی ئارسناڵ بەرامبەر ئاتلێتیکۆ رێک ئەمەیان سەلماند: تەنانەت هێرشبەریترین تیمەکانیش پێویستیان بە هاوسەنگی، بەندەبەست و خۆڕاگری هەیە. ئەمە تێکەڵەیەکە کە چەندین شەوی گەورەی ئەورووپیمان بەبیر دەهێنێتەوە کە لەلایەن جۆزێ مۆرینیۆوە سەرپەرشتی کراون.
هێرشبردن یارمەتی بردنەوەی یارییەکان دەدات، بەڵام بەرگریکردن بە شێوەیەکی دروست هێشتا بنچینەییە بۆ بردنەوەی نازناوەکان. ئەمەش رێک ئەو شتەیە کە پاریس و ئارسناڵ لە رێگایاندا بەرەو یاریی کۆتایی لە بوداپێست نیشانیاندا.