پڕە لە خۆپەرستی؛ ئەستێرەیەکی پێشووی هەڵبژاردەی فەرەنسا رەخنەی توند لە ئێمباپێ دەگرێت

یاریگا –

لێکەوتەکانی کرانەدەرەوە دراماتیکییەکەی ریال مەدرید لە چامپیۆنزلیگ بەردەوامە و پەنجەی تۆمەت بە توندی ئاراستەی کیلیان ئێمباپێ و ئێدوارادۆ کاماڤینگا دەکرێت.

دوای دۆڕانە تاڵەکەیان بەرامبەر بایرن میونشن لە قۆناخی چارەکی کۆتایی، ئیمانوێل پێتی، یاریزانی پێشووی هێڵی ناوەڕاستی ئارسیناڵ و چێڵسی، رەخنەی توندی لە ریال مەدرید گرت.

لە لێدوانێکیدا بۆ کەناڵی RMCـی فەرەنسی، پێتی، ئێمباپێی بەوە تۆمەتبار کرد کە لە دوای گەڕانەوەی لە پێکانێکی سووکی ئەژنۆی، زیانێکی زۆری بە هاوئاهەنگی تیمەکە گەیاندووە و گوتی؛

بە تەنیا خەتای ئێمباپێ نییە، بەڵام هاتنی ئەو ژووری جلگۆڕینی ریال مەدریدی پڕکرد لە خۆپەرستی. ئەوەش کارەساتە.

هەروەها ئاماژەی بەوەش کرد کە تیپەکەی ئالڤارۆ ئاربێلوا کاتێک ئەستێرە فەرەنسییەکە پێکانی هەبوو، توانیبوویان سەرکەوتن بەسەر مانچێستەر سیتی و ئاتلێتیکۆ مەدرید بەدەستبهێنن، پاریس سان جێرمان بەبێ کیلیان زۆر بەهێزتر دەردەکەوێت.

کاڵە کارەساتبارەکەی کاماڤینگا
سەرەڕای رەخنە توندەکان لە ئێمباپێ، پێتی دانی بەوەدانا کە هۆکاری سەرەکی دۆڕانەکە کاماڤینگا بوو.

ئەگەر بڕیار بێت لۆمەی کەسێک بکرێت، ئەوە کاماڤینگایە. فاوڵەکەی کارەساتبار بوو. کارتی سوورەکە زۆر قورس بوو، بەڵام ناوبژیوان تەنیا یاساکانی جێبەجێدەکرد.