یاریگا –
سەفین کانەبی، ئەندامی دەستەی کارگێڕیی یانەی هەولێر و سەرۆکی پێشووتری یەکێتیی تۆپی پێی کوردستان، لە لێدوانێکی راشکاوانەدا باسی دۆخی وهرزشی كوردستان و یانهی ههولێر دهكات.
كانهبی بۆ یاریگا تۆك كه بڕیاره ئهمشهو كاتژمێر 08:00 له پلاتفۆرمهكانی تۆڕی وهرزشی یاریگا بڵاوبكرێتهوه، پەردەی لەسەر کۆمەڵێک نهێنی و راستیی تاڵ هەڵدایەوە باسی كۆمهلێك كێشهی كرد كه رووبەڕووی یانەی هەولێر و گشتیی کایەی وەرزشیی کوردستان بووەتەوە.
وەرزشی کوردستان بەرەو دواوە دەچێت
سەفین کانەبی بە نیگەرانییەوە باسی لە دۆخی ئێستای وەرزشی هەرێم کرد و رایگەیاند:
“تۆپی پێی کوردستان زۆر بەرەو دواوە چوووە و بەداخەوە ئێستا کەس خۆی بە خاوەنی وەرزشی ئەم ههرێمه نازانێت.
“ ناوبراو بەرپرسانی وەرزشیی بە بەرپرسیاری یەکەم لە قەڵەمدا و ئاماژەی بەوە کرد کە کەسانی کەم ئەزموونیان هێناوەتە پێشەوە، لە کاتێکدا بەڕێوەبردنی وەرزش پێویستی بە “عەقڵ و داناییە” نەک هێز.
هەڵبژاردنەکانی عێراق؛ کورد زەرەرمەندی یەکەمە
سەبارەت بە هەڵبژاردنەکانی داهاتووی یەکێتیی تۆپی پێی عێراق، کانەبی هۆشدارییەکی توندی دا و گوتی:
“جاران تەنیا دوو نوێنەرمان رەوانە دەکرد و هەردووکیان دەردەچوون، بەڵام ئێستا بۆ 11 کورسی، 7 کورد خۆیان بهربژێر کردووە؛ ئەم پەرشوبڵاوییە نیشانەی بێ کەسیی وەرزشی کوردستانە و کورد تێیدا زەرەرمەندی گەورە دەبێت.”
قەیرانە داراییەکەی یانەی هەولێر؛ یەک ملیار دینار قەرز!
سەفین کانەبی راستییە داراییەکانی ناو یانەی هەولێری ئاشکرا کرد و رایگەیاند کە یانەکە لە دۆخێکی زۆر سەختدایە. بەپێی وتەکانی ئەو:
یاریزانانی ئێستای یانەکە نزیکەی سێ مانگە مووچەیان وەرنەگرتووە.
بڕی 750 ملیۆن دینار قەرزی یاریزانانی پێشووی یانەکە لەسەر کارگێڕیی ماوەتەوە.
کۆی گشتیی قەرزەکانی یانەکە بە پارەی هۆتێل، چێشتخانە و پێداویستییەکانی تر دەگاتە نزیکەی یەک ملیار دینار.
دەستوەردانی دەرەکی و یەکڕیزیی کارگێڕی
لەبارەی کێشە ناوخۆییەکانی یانەی قەڵا و منارە، کانەبی جەختی کردەوە کە ئەگەر دەستەی کارگێڕی یەکدەست و تەبا بن، هیچ کەسێک ناتوانێت دەستوەردان لە کاروباری یانەکە بکات. گوتیشی:
“پێویستە هەموو کێشە کەسییەکان بەلاوە بنێین و تەنیا بیر لە خزمەتی یانەی هەولێر بکەینەوە.”
وازهێنان لە پۆستی سەرۆکایەتی
سەبارەت بە دەستلەکارکێشانەوەی لە پۆستی سەرۆکی یانەی هەولێر و گۆڕانکارییەکان، کانەبی رایگەیاند کە ئەو بڕیارە بە ویستی خۆی بووە بۆ ئەوەی پۆستەکە بۆ سەفین یاسین چۆڵ بکات، بەو ئومێدەی خزمەتێکی باشتر بە یانەکە بکرێت.
هەروەها ئاماژەی بەوەش کرد کە کاتی خۆی کاتێک لە یەکێتیی تۆپی پێی کوردستان کشایەوە، هیچ فشارێکی لەسەر نەبووە و تەنیا بڕیاری خۆی بووە.
ئەم لێدوانانەی سەفین کانەبی وەک زەنگێکی مەترسی دەبینرێت بۆ ناوەندە وەرزشییەکان، کە پێویستە بە پەلە ئاوڕ لە دۆخی دارایی یانەی هەولێر و داهاتووی یەکێتیی تۆپی پێی کوردستان بدرێتەوە.
