یاریگا –
لە کاتێکدا گرژییە سەربازییەکانی رۆژهەڵاتی ناوەڕاست گەیشتوونەتە لوتکە، دوو یاریزانی ئیسپانی کە لە خولی ئێران یاری دەکەن، گەشتێکی پڕ لە ترس و ئاستەنگیان بڕی تاوەکو توانییان خاکی ئێران جێبهێڵن.
رۆژنامهی ئاسی ئیسپانی ئاشكرایكردووه ههریهكه له یاریزانان مونیر حەدادی و ئیڤان سانچێز دوای 12 کاتژمێری بە ئۆتۆمبێل، گەیشتنە خاکی تورکیا و لەوێوە بەرەو ئیسپانیا بەڕێکەوتن.
موشەکەکان لە ئاسماندا دەتەقێنرانەوە
ئیڤان سانچێز، یاریزانی یانەی سپاھان لە لێدوانێکی تایبەتدا بۆ رۆژنامەی ئاس باسی لە ساتە ترسناکەکان کرد و گوتی:
جار و بار هەندێک موشەکمان دەبینی لە ئاسماندا دەتەقێنرانەوە، بەڵام بە گشتی گەشتەکەمان ئارام بوو
ئیڤان کە تەمەنی 33 ساڵە، باسی لەوە کرد کە یانەکەی پاسەوان و گواستنەوەی تایبەتی بۆ دابین کردوون تاوەکو گەیشتوونەتە سنووری تورکیا.
مۆنیر حەدادی؛ لە فڕۆکەخانەوە بۆ رێگای وشکانی
مۆنیر حەدادی، ئەستێرەی پێشووی بارسێلۆنا و یاریزانی ئێستای یانەی ئیستقلال، چیرۆکێکی جیاوازی هەبوو، ئەو لە ناو فڕۆکەدا بوو خهریك بوو فرۆكهكه بهرزدهبووهوه، بەڵام بەهۆی داخستنی ئاسمانەوە هەموو سەرنشینەکانیان دابەزاند. مۆنیر لە تۆڕە کۆمەڵایەتییەکانی نووسیویەتی:
“سوپاسی یانەکەم دەکەم کە ئۆتۆمبێلی بۆ دابین کردم تا بە وشکانی خاکی ئێران جێبهێڵم، ئێستا لە تورکیا پارێزراوم و بەرەو ئیسپانیا دەگەڕێمەوە.”
گەشتە 12 کاتژمێرییەکە
یاریزانەکان باسی ئهوهیان كرد کە گەشتەکەیان 12 کاتژمێری خایاندووە تاوهكو گەیشتوونەتە سنوور، دوای ئەوەش 2 کاتژمێر بە تاکسی رۆیشتوون بۆ شاری وان لە تورکیا و لەوێوە گەشتی ئاسمانییان بەرەو ئەستەنبوڵ و پاشان مەدرید كردووه، ڕیکاردۆ ئەلڤێسی یاریزانی پورتوگالیش هاوەڵی ئیڤان سانچێز بووە لەم گەشتەدا.
وەرزشوانانی تری ئیسپانیا لە ئێران
جگە لە یاریزانەکان، پێپێ لۆسادا راهێنەری توانای جەستەیی و ئیمیلیۆ ئەلڤارێز راهێنەری گۆڵپارێزانی پێرسێپۆلیس بە هەمان شێوە و بە ڕێگای وشکانی توانیویانە خۆیان بگەیەننە خاکی تورکیا، ئەمە لە کاتێکدایە کە هەموو چالاکییە وەرزشییەکان لە ئێران و بهشێكی زۆر له وڵاتانی كهندا و راگیراون و چارەنووسی پاڵەوانێتییە نێودەوڵەتییەکان لە مەترسیدایە.
ئەم رزگاربوونە دراماتیکییە نیشانەی ئەو بارودۆخە سەختەیە کە وەرزشوانە بیانییەکان لە ناوچەکەدا پێیدا تێدەپەڕن، لە کاتێکدا جەنگ هەڕەشە لە هەموو سێکتەرەکان دەکات.
