فلۆرێنتینۆ پێرێز گرێبەستێکی گەورەی لەدەست دەچێت

یاریگا –

ریال مەدرید بۆ گواستنەوەی هاوینی داهاتوو خۆی ئامادە دەکات.

ریال مەدرید دوای وەرزە بێهیواکەرەکەی، پلان دادەنێت لە گواستنەوەی هاوینەی داهاتوو پارەیەکی زۆر خەرج بکات. دوای دەستنیشانکردنی چابی ئالۆنسۆ وەکوو راهێنەر، شتەکان بەو شێوەیە نەڕۆیشتن کە فلۆرێنتینۆ پێرێز پێشبینی دەکرد و ئاستی تیمەکە لە ئاستی چاوەڕوانییەکان نییە. ئەگەرچی هێشتا هیچ دڵنیاییەک سەبارەت بە ستافی راهێنەران نییە، بەڵام یانەکە خۆی بۆ بنیادنانەوەیەکی گەورە ئامادە دەکات.

بە گوێرەی رۆژنامەی سپۆرت لە چەند رۆژی رابردوو ئێنزۆ فێرناندێز ناوی بە ریال مەدریدەوە بەسترابووەوە، وەکوو ئەستێرەیەکی ناوەڕاست بۆ بەهێزکردنی ناوەڕاستی یانەکە دوای رۆیشتنی تۆنی کڕووس و لوکا مۆدریچ. ناوەڕاستکارە ئەرجەنتینییەکە جێهێشتنی چێڵسی رەتکردووەتەوە. لە چاوپێکەوتنێکدا لەگەڵ سکای سپۆرتس، ئێنزۆ دەڵێت کە لە یانەکە هەست بە دڵخۆشی دەکات و دەیەوێت لەو یانەیە نازناوەکان بباتەوە.

ئێنزۆ فێرناندێز یەکێک لە باشترین وەرزەکانی کاروانی وەرزشیی لە ئەوروپا بەڕێدەکات، 8 گۆڵی بۆ چێڵسی کردووە. لەو کاتەوەی راهێنەریان گۆڕیوە، ئاستی چێڵسی بەرەوپێشچووە و ئێنزۆ سوودێکی باشتری لە ئەرکێکی قووڵتر لە هێڵی ناوەڕاست بینیوە، کە تێیدا دەتوانێت کۆنتڕۆڵی یاری بکات و لە دواوە بچێتە نێو هێڵی سزاوە.