هەرگیز نەرۆیشتووە؛ ئیبراهیمۆڤیچ کۆتایی بە مشتومڕەکانی دەوری رۆناڵدۆ دەهێنێت

یاریگا –

کریستیانۆ رۆناڵدۆ بووە یەکەم یاریزان لە مێژوودا لە 6 مۆندیالی جیاوازدا گۆڵ بکات، ئەمەش وەڵامێک بوو بۆ هەموو ئەو گومانانەی لەسەری هەبوون.

کاتێک فیکەی کۆتایی یارییەکە لە هوستن لە رۆژی سێشەممە لێدرا، کریستیانۆ رۆناڵدۆ بەرەو نزیکترین کامێرا رۆیشت، سەیری ناو هاوێنەکەی کرد و هاواری کرد: “من گەڕامەوە”. کاتێک دواتر لە ناوچەی تێکەڵدا پرسیاری لێکرا، هۆکارەکەی روون کردەوە و گوتی: “بۆ ئەوەی خەڵک لەبیری نەکەن.”

رۆناڵدۆ دوو گۆڵی کرد بۆ ئەوەی ببێتە یەکەم یاریزان لە مێژوودا لە شەش مۆندیالی جیاوازدا گۆڵ بکات و سەرکردایەتیی تیمی نیشتمانیی پۆرتوگالی کرد بۆ سەرکەوتنێکی گەورە بە ئەنجامی 5-0 بەرامبەر ئوزبەکستان.

ئەو لە خولەکی شەشـدا دەرگای گۆڵکردنی کردەوە کاتێک لە ناوچەی شەش یاردەدا خولایەوە بۆ پێشوازیکردن لە پاسێکی جواو کانسیلۆ و تۆپەکەی ئاراستەی گۆڵی عەبدولواحید نێماتۆڤی گۆڵپارێز کرد. گۆڵی دووەمی لە خولەکی 39ـدا هات، دوای وەرگرتنی پاسێکی گونجاو لە برونۆ فێرناندێشەوە. ئەم ئەنجامە پۆرتوگالی بردە لێواری قۆناخی داهاتوو دوای یەکسانبوونی یەکەمیان بە ئەنجامی 1-1 لە بەرامبەر کۆماری دیموکراتیی کۆنگۆ.

رۆناڵدۆ لە لێدوانێکدا بۆ کەناڵی Sport TV ئاماژەی بەوە کرد کە هەفتەی رابردوو قورسترین هەفتەی کاروانی وەرزشیی بووە و گوتی:

هەفتەیەکی سەخت و خراپ بوو. وا دەستیپێکرد وەکوو بڵێی من لە تۆپی پێ خانەنشین بووبێتم. بەڵام بەرگەم گرت، وەکوو هەمیشە بەرگە دەگرم، چونکە من زیاتر بڕوام بە کارکردن هەیە وەک لە تۆپی پێ.

کاردانەوەی ئەستێرە و یاریزانە دێرینەکان

کاردانەوەی شیکەرەوەکان و یاریزانانی پێشوو زۆر خێرا بوو.

رۆی کین لە کەناڵی ITV راشکاوانە گوتی:

ئەم پیاوە سەرنجڕاکێشە، یاریزانێکی ناوازەیە. ئامارەکان نایابن و هیچ شتێک نییە مایەی سەرسوڕمان بێت. ئەو کارانەی لە ماوەی 20 ساڵی رابردوودا لە تۆپی پێدا کردوویەتی، ناوازەن.

ریۆ فێردیناند لە تۆڕی کۆمەڵایەتیی X وەڵامەکەی زۆر کورت بوو، نووسی: “بێدەنگ بن.”

زڵاتان ئیبراهیمۆڤیچ لە کەناڵی Fox Sports بە شێوازێکی ساردوسڕ گوتی:

من پێموابوو ئەو هەرگیز نەڕۆیشتووە، نازانم بۆچی دەڵێت ‘من گەڕامەوە’. کاتێک هەمووان پێیان وایە پیاوی سەرەکی لێدانەکە جێبەجێ دەکات، ئەو لێدانە راستەوخۆکە بۆ نونۆ مێندێش جێدەهێڵێت. ئێستا هەموو ئەستێرەکان لە مۆندیالدا خۆیان نیشانداوە.

تیێری هێنری، کە توندترین رەخنەگری رۆناڵدۆ بوو دوای یەکسانبوونەکەی کۆنگۆ، دوای فیکەی کۆتایی گوتی: “رۆژێکی ئاسایی بوو لە شوێنی کارەکەیدا.”

ئۆوین هارگریڤز، هاوتیمی پێشووی لە مانچێستەر یونایتد گوتی:

کریستیانۆ گۆڵی خۆی دەکات. کاتێک تۆپی پێشکەش دەکرێت، ئەو گۆڵ دەکات، لە هەر شوێنێک بووبێت وایکردووە. تیمەکە هێزی هێرشبردنی زۆری هەیە.

لی دیکسن، بەرگریکارەی پێشووی ئینگلتەرا لە کەناڵی ITV گوتی:

دەتوانیت هەست بەوە بکەیت کە گرژییەکە نەماوە، مووی لەشت گرژ دەبێت [لەبەر جۆش و خرۆش]. هەر کەسێک کە تۆپی پێی خۆشبووێت، دڵخۆش دەبێت بەوەی ئەم گۆڵەی کردووە. ئەو ئێستا زۆر بەجۆش و خرۆشە.

فابیۆ کاناڤارۆ، راهێنەری ئوزبەکستان کە وەکوو یەکێک لە باشترین بەرگریکارەکانی ئیتالیا چەندین جار رووبەڕووی رۆناڵدۆ بووەتەوە، ستایشێکی جیاوازی پێشکەش کرد و گوتی:

وەکوو بەرگریکارێک پێویستە زۆر زیرەک بیت بۆ ئەوەی لەو نزیک بیت، چونکە ئەگەر تەنیا یەک سانتیمەتری لە ناوچەی سزادا پێبدەیت، تۆ کۆتاییت پێهاتووە. من پێم گوت؛ رەنگە بتوانیت ساڵانی دیکەش بەردەوام بیت و واز نەهێنیت، چێژ لە تۆپی پێ وەربگرە. چونکە ئەگەر هێشتا بەم شێوازە بیت، بۆچی بەردەوام نەبیت؟

گۆڵەکانی رۆناڵدۆ لە مۆندیال گەیشتنە 10 گۆڵ و پێش ئۆزێبیۆ کەوت وەکوو گۆڵکاری مێژوویی پۆرتوگال لەم پاڵەوانییەتییەدا. ئەو ئێستا دووەم بەتەمەنترین گۆڵکارە لە مێژووی مۆندیالدا، لە دوای رۆجەر میلای کامیرۆنی. پۆرتوگال رۆژی شەممە رووبەڕووی کۆڵۆمبیا دەبێتەوە، ئەمەش دەبێتە تاقیکردنەوەیەکی راستەقینە.