یاریگا –
بۆ ماوەی زیاتر لە سەدەیەک، بۆکسینگ دەی له 26ـی کانوونی یەکەم گرنگترین رۆژ بووه لە ساڵنامەی تۆپی پێی ئینگلتەرا. نەریتەکە وابوو کە زۆربەی یارییەکانی گەڕەکە لە یەک کات و لە یەک رۆژدا دهكرا، بەڵام ئەمساڵ (وەرزى 2025-2026) هاندەران تووشی شۆک بوون کاتێک بینییان تەنیا یەک یاری لەو رۆژە دهكرێت.
چی گۆڕاوە؟
لەکاتێکدا ساڵانی پێشوو لەم رۆژە 8 بۆ 10یاریی دهكران، ئەمساڵ تەنیا یاری نێوان مانچێستەر یونایتد و نۆکاسڵ لە 26ـی کانوونی یەکەم بەڕێوە دەچێت، یارییەکانی تری ئەم گەڕە دابەش کراون بەسەر رۆژانی شەممە 27 و یەکشەممە 28ـی مانگ.
بۆچی پرێمەرلیگ ئەم کارەی کرد؟ (هۆکارە سەرەکییەکان)
پارە و مافی پەخشی تەلەفزیۆنی
ئەمە هۆکاری سهرهكیه، کۆمپانیاکانی پەخشی تەلەفزیۆنی (وەک سکای سپۆرت، تی ئێن تی، و ئامازۆن) بڕە پارەیەکی خەیاڵییان داوە بە خولەکە، کاتێک هەموو یارییەکان لە یەک کاتدا بن، بینەر تەنیا دەتوانێت یەک یاری ببینێت. بەڵام کاتێک یارییەکان بەسەر سێ رۆژدا دابەش دەکرێن،، رێژەی بینەر و داهاتی ریکلام بۆ لوتکە بەرز دەکاتەوە.
پاراستنی یاریزانان لە پێکان
یەکێتی یاریزانانی پیشەگەری ئینگلتەرا چەندین ساڵە فشار دەکات بۆ ئەوەی خشتەی یارییەکان هێندە چڕ نەبێت. دابەشکردنی یارییەکان بەسەر چەند رۆژێکدا، هەندێک کاتی زیاتر دەدات بە یانەکان بۆ پشوو و گەشتکردن، ئەمەش ئەگەری پێکان لەم قۆناخە مەترسیدارەی وەرزدا کەم دەکاتەوە.
ئیسپانییەکان لە لوتکەدان
سێ تیپی پێشەنگی خولەکە ئێستا لەلایەن سێ راهێنەری ئیسپانییەوە سەرکردایەتی دەکرێن، کە کێبڕکێیەکی توند لە نێوانیاندا هەیە:
ئارسناڵ (میکێل ئارتێتا): لە پلەی یەکەمدایە و بەدوای یەکەم ناسناودا دەگەڕێت لە دوای ساڵی 2004.
مانچێستەر سیتی (پێپ گواردیۆلا): بە جیاوازی تەنیا ٢ خاڵ لە پلەی دووەمدایە.
ئاستۆن ڤێلا (ئۆنای ئیمری): ئەم وەرزەیە و لە پلەی سێیەمدایە بە جیاوازی 3خاڵ لە پێشەنگ دووره، دوای ئەوەی حهفت سەرکەوتنی لەسەریەکی لە خولەکەدا بەدەستهێناوە.
یارییە یەکلاکەرەوەکان و “نەفرەتی پێشەنگی”
ئەم ماراسۆنە تاوهكو 8ـیی کانوونی دووەمی 2026 بەردەوام دەبێت و بە یارییەکی لوتکەیی لە نێوان ئارسیناڵ و لیڤەرپوڵ کۆتایی دێت.
مێژوو هۆشداری دەداتە هاندەرانی ئارسیناڵ؛ لە وەرزەکانی 2022-2023 و 2023-2024 ئارسیناڵ لە رۆژانی بۆکسینگ دەی، پێشەنگ بوو، بەڵام لە کۆتاییدا نازناوەکەی بۆ مانچێستەر سیتی لهدهستدا، ئایا ئەمساڵ ئارتێتا دەتوانێت ئەو نەفرەتە بشکێنێت؟
ئامارەکان چی دەڵێن؟
بەر لە دەسپێکردنی ئەم گەڕە، ژمارەکان هێزی یانەکان نیشان دەدەن:
بەهێزترین هێلی هێرشبەر: مانچێستەر سیتی (41گۆڵ).
بەهێزترین هێلی بەرگری: ئارسیناڵ (تەنیا 10گۆڵیان لێکراوە).
باشترین گۆڵپارێز: داڤید رایا (ئارسیناڵ) بە 9 کلین شیت.
گۆڵكاری خول: ئێرلینگ هالاند بە 19 گۆڵ لە پێشەنگی گۆڵکاراندایە.
لەم 15 رۆژەدا، هەموو چاوەکان لەسەر ئینگلتەران، ئایا ئیمری و ئاستۆن ڤێلا جیهان شۆک دەکەن؟ یان گواردیۆلا و ئارتێتا شەڕی نازناوەکە لە نێوان خۆیاندا دەهێڵنەوە؟
