دێپای لە شکاندنی ریکۆردە نێودەوڵەتییەکان ناوەستێت
ریکۆردێکی مێژوویی وێسلی شنایدەری شکاند
یاریگا –
مێمفێس دێپای، ئەستێرەی هۆڵەندا لە یاریی دوێنێی هەڵبژاردەکەی بەرامبەر فینلاند، ژمارەیەکی پێوانەیی دیکەی بەناوی خۆی تۆمارکرد.
هۆڵەندا یارییەکەی 3-0 بردەوە و دێپای دوو گۆڵی دروستکرد، بەمەش ژمارەی ئەسیستەکانی لەگەڵ هۆڵەندا بۆ 35 بەرزکردەوە و پێش وێسلی شنایدەر کەوت کە خاوەنی 33 ئەسیست بوو.
دێپای، هێرشبەری کۆرێنتیانزی بەڕازیلی لە سێپتێمبەر/ئەیلوولی رابردوودا، دوو گۆڵی لە لیتوانیا کرد و بەکۆکردنەوەی 54 گۆڵ بووە گۆڵکاری مێژوویی هۆڵەندا.
دێپای چوار گۆڵ پێش رۆبن ڤان پێرسی کەوتووە و کلاس یان هونتلار بە 42 گۆڵ لە پلەی سێیەمە بە جیاوازی دوو گۆڵ لەگەڵ پاتریک کلویڤێرت، کەچی دێنیس بێرکام و ئاریێن روبن هەریەکە 37 گۆڵی هەیە.
Oranje’s all-time 𝐌𝐕𝐏. 🇳🇱
Most goals & most assists in history. 📖#NothingLikeOranje | @Memphis pic.twitter.com/HGvBRE2Vug
— OnsOranje (@OnsOranje) October 12, 2025
ئەستێرە هۆڵەندییەکە لە شکاندی ریکۆردەکان بەردەوامە و شەوی رابردوو 106مین یاریی نێودەوڵەتی کرد و ژمارەی یارییەکانی لەگەڵ جیۆڤانی ڤان بڕۆنکهۆرست یەکسانکردەوە، ئێستا لە پلەی شەشەمی زۆرترین بەشداری لەگەڵ هۆڵەندایە.
