خشتەیەکی جەنجاڵ: ریال مەدرید دوو رۆژ جارێک یارییەک دەکات

یاریگا –

فێدراسیۆنی تۆپی پێی ئەوڕوپا، رێکەوت و کاتی یارییەکانی قۆناخی خولی چامپیۆنزلیگی ئاشکرا کرد.

ریال مەدرید لە هەفتەی حەفتەمی لالیگا لە رێکەوتی 27ـی ئەیلول رووبەڕووی ئاتلێتیکۆ مەدرید دەبێتەوە و رۆژی دواتر دەبێت بە گەشتێکی 12 کاتژمێری بگاتە کازاخستان تاوەکوو رۆژی سێشەممە 30ی ئەیلول بەرامبەر ئالماتی یاریی بکات.

یارییەکەی بەرامبەر ئالماتی یەکێک دەبێت لە سەختترین یارییەکان لە ماوەی دوو هەفتەی جەنجاڵدا بۆ ریال. لە 21ی ئەیلول تا 5ی تشرینی یەکەم، یانە شاهانەکە لە ماوەی 14 رۆژدا پێنج یاری دەکات (ئیسپانیۆل، لێڤانتی، ئاتلێتیکۆ مەدرید، ئالماتی و ڤیاریال). ئەمەش واتە کەمتر لە سێ روژ پشوو بۆ هەر یارییەک.

دوای گەڕانەوەی لە کازاخستان، تیپەکەی چابی ئالۆنسۆ لە 4ـی ئۆکتۆبەر لە یاریگای بێرنابیۆ میوانداری ڤیاریال دەکات.