گەرمە دەیەوێت بەرگریکارێکی بەناوبانگی کورد بگوازێتەوە ریزەکانی

یاریگا –

یانەی گەرمە دەیەوێت ئالان محێدین بەرگریکاری هەڵبژاردەی عێراق بگوازێتەوە ریزەکانی، کە ئەو بەرگریکارە کوردە لە خولی سویدی یاریی دەکات.

یانەی گەرمە کە لە مێرکاتۆی زستانە دەستکراوەترین یانەی عێراقییە و لە یەکەم وەرزی یاریکردنی لە خولی ئەستێرەکانی عێراق زۆرترین پارە لە کڕینی یاریزانان خەرج دەکات، لەگەڵ ئالان محێدین بەرگریکاری کوردی هەڵبژاردەی عێراق دەستی بە گفتوگۆ کردووە و دەیەوێت ئەو بەرگریکارە بگوازێتەوە ریزەکانی.

ئالان محێدین بەرگریکاری ئوستیکتێنسی سویدی لە خولی سوپەرئیتانی سویدی یاریی دەکات، تاوەکو کۆتایی ئەمساڵ گرێبەستی لەگەڵ یانەکەی ماوە، ئەو بەرگریکارە 31 ساڵانە هاوینی رابردوو نزیکبوو پەیوەندی بە ریزەکانی قوە جەوییە بکات.

بەرگریکارە 31 ساڵانەکە لە ساڵی 2024 لە جام و خولی سویدی لە 29 یاری بە درێسی ئوستیکتێنس گۆڵێک و ئەسیستێکی کردووە و خاوەنی 3 یاریی نێودەوڵەتیشە بە درێسی هەڵبژاردەی عێراق.

ئالان محێدین خەڵکی شاری سلێمانییە لە شاری گۆتیبۆرگ لە سوید لەدایکبووە، لە سەرەتای کاروانی وەرزشییەوە لە یانەکانی سوید یاریی دەکات، پێشتر یاریی بۆ یانەکانی ئۆرگرێتە و گایس گۆتینبێرگی سویدی کردووە و ئێستا لە بۆرسەی یاریزانان نرخەکەی 150 هەزار یۆرۆیە.