یاریگا –
کریستیانۆ رۆناڵدۆ لەگەڵ خانەوادەکەی پشووەکانی سەری ساڵ لە لاپلاند بەسەردەبات.
کریستیانۆ و جورجینا رۆدریگێز جارێکی دیکە بە بڵاوکردنەوەی ڤیدیۆیەک ملیۆنان فۆڵۆوەرسیان دڵخۆشکرد بە نیشاندانی گەشتەکەیان بۆ ناوچەی سەرسوڕهێنەری لاپلاند لە فینلاند.
لاپلاند کەشێکی بەفرینی و ساردی هەیە بەوە بەناوبانگە بۆ یەکەمجار سانتا کڵاوس لەوێ دەرکەوتووە. لە پشووەکانی کریسمەس بەردەوام گەشتیاران رووی تێدەکەن.
لە وێنەو ڤیدیۆەکانی رۆناڵدۆ و جۆرجینا بڵاویانکردووەتەوە دەردەکەوێت ماتیۆ، ئیڤا، ئالانا و بێلا بۆ یەکەمجار بە تامەزرۆییەوە چاویان بە سانتا کڵاوس کەوتووە. جۆرجینا نوسیوییەتی؛
گەشتێکی لەبیرنەکراو، باشترین شێواز بۆ بەسەربردنی کاتێکی خۆش لە کریسمەس. جۆش و خرۆشانی منداڵەکان باوەڕپێنەکراو بوو. هەمووان چێژ لە پلەی ساردی و گەرمی وەردەگرن.
خێزانەکە نیشانیانداوە چۆن چێژیان لە لێخوڕینی ئۆتۆمبێلی سەر بەفر و خواردنی شۆکۆڵاتەی گەرم و مارشمالۆ و بەسەربردنی کاتێکی ئارام بەیەکەوە بەسەربردووە.
خێزانەکە لە خانوویەک ماونەتەوە بە چواردەوردا پەنجەرەی گەورەی هەبووە و بە تەواوی دیمەنی بەفرینی لاپلاند لەبەرچاویاندا بووە. نرخی مانەوەی شوێنێکیش لەوێ بۆ هەر شەوێک دەگاتە 2100 دۆلار.
بەڵام سەرنجڕاکێشترین بەشی گەشتەکەیان ئەو ساتەیە کریستیانۆ رۆناڵدۆ لە سەرمای بێوێنەی لاپلانددا لە 20 پلەی سیلیزی ژێر سفر بەبێ جل و بەرگ دەچێتە ناو حەوزێکی بەستوو. کارەکەی دۆن هەمووانی سەرسامکرد و هەرزوو بوو بە باسی گەرمی ئینتەرنێت.
لوکاس ڤاسکێسی ئەستێرەی ریال مەدرید بۆی نوسیووە “باش دەزانێت چۆن ئاگاداری تەندروستی خۆی بێت” یاریزانانی پێشووی مانچێستەر یونایتد ریۆ فێردیناند و دەیڤد دی خیا بۆیان نوسیووە “تۆ شێتیت” وەک دەربڕینی سەرسامییەک چۆن دەتوانێت لەو کەشە ساردەدا ئەو کارە بکات.
ئەمە جاری یەکەم نییە خێزانەکەی کریستیانۆ سەردانی لاپلاند دەکەن، سێ ساڵ لەمەوبەر بۆ هەمان شوێن گەشتیان کردووە، بەڵام ئەوکات بێلا لەدایک نەبوو بوو. ئێستا خێزانەکە بەپێچەوانەی کەشە گەرمەکەی سعوودیە ساتێکی ئارام لە کەشە ساردەکەی فینلاند بەسەردەبەن و ئەمزموونێکی لەبیرنەکراو و یادەوەری شیرین لەگەڵ منداڵەکانیان دروست دەکەن.
