یاریگا –
راستی میهرەبانی کۆمێنتاری تۆڕی وەرزشی یاریگا بە باشترین کۆمێنتاری کوردی 2023/2024 دەستنیشانکرا.
راستی میهرەبانی کۆمێنتاری لاوی کورد کە لە تۆڕی وەرزشی یاریگا کۆمێنتاری بۆ یارییەکانی خولی ئەستێرەکانی عێراق دەکات، لەلایەن ناوەندی وەرزشی کوردستانەوە لە فێستیڤاڵی وەرزشی خەڵاتی کەسایەتی ساڵ وەکو باشترین کۆمێنتاری وەرزشی لە ساڵانی 2023/2024 دەستنیشانکرا.
راستی فەهمی محەمەد ناسراو بە ‘راستی میهرەبانی’ ساڵی 2001 لە هەڵەبجە لەدایکبووە و لە راگەیاندن بڕوانامەی بەکالۆریۆسی بەدەستهێناوە و چوار ساڵە کاری کۆمێنتاری لە خولە ناوخۆییەکان و جیهانییەکان و تیپە میللییەکان دەکات.
راستی میهرەبانی لەبارەی بەدەستهێنانی خەڵاتەکەی دەڵێت :’سوپاس بۆ خوای گەورە و دایکم و باوکم توانیم خەڵاتی باشترین کۆمێنتاری کوردستان لە ساڵی 2023/2024 بەدەستبهێنم، سوپاسێکی بێ پایانیش بۆ تۆڕی وەرزشی یاریگا هەیە کە بەردەوام هاوکارێکی گەورەی منن و هۆکارێکی گەورەن بۆ بەدەستهێنانی خەڵاتەکە’.
