یاریگا –
براوەی خەڵاتی زەبێستی 2024 ئاشکرابوو، رۆژنامەیەکی مەدریدی دەڵێت ڤینیسیوس جونیۆر خەڵاتەکە دەباتەوە.
رۆژنامەی ئاسی ئیسپانی ئاشکرایکردووە، ڤینیسیوس جونیۆر هێرشبەری بەڕازیلی یانەی ریال مەدریدی خەڵاتی زەبێستی 2024 دەباتەوە و کارلۆ ئەنچیلۆتی راهێنەری ئیتاڵی یانەی ریال مەدریدیش خەڵاتی باشترین راهێنەری ساڵ بەدەست دەهێنێت.
رۆژنامە ئیسپانییەکە ئاشکرایکردووە، جود بێڵینگهام لە لیستی باشترین پێنج یاریزانی زەبێستی 2024 دەبێت، کە ئەمشەو لە دەوحە لە قەتەڕ رێوڕەسمی دابەشکردنی خەڵاتەکانی زەبێست ساز دەکرێت، کە ریال مەدرید بۆ یاریی کۆتایی جامی کیشوەرەکانی یانەکان لە قەتەڕە و سبەی لە دەوحە رووبەڕووی پاچوکای مەکسیکی دەبێتەوە.
پێشتر میدیاکانی مەدرید پێشبینیان دەکرد ڤینی خەڵاتی باڵۆن دۆر بباتەوە، کەچی دواتر رۆدری باڵۆن دۆری بەدەستهێنا و ریال مەدرید بایکۆتی رێوڕەسمی دابەشکردنی خەڵاتەکانی باڵۆن دۆری کرد.
