مانچێستەر یونایتد چەند پارەی وەکو قەرەبوو بە ئێریک تێن هاخ داوە؟

یاریگا –

مانچێستەر یونایتد بڕی 10.4 ملیۆن پاوەندی وەکو قەرەبوو بۆ ئێریک تێن هاخ و ستافەکەی خەرجکردووە.

شەوی رابردوو مانچێستەر یونایتد، ئەنجامی دارایی سێ مانگی بڵاوکردووەتەوە و تیایدا هاتووە، بڕی 21 پاوەند، بۆ گۆڕینی راهێنەر خەرجکراوە.

مان یونایتد بڕی 11 ملیۆن پاوەندی بۆ دەستنیشانکردنی روبن ئامۆریم، وەکو راهێنەری نوێی یانەکە خەرجکردووە.

لەوەتەی دوورخستنەوەی دەیڤد مۆیس لە ساڵی 2014، مان یونایتد بڕی 70 ملیۆن پاوەندی وەکو قەرەبوو لە راهێنەران زیانکردووە.

لەدوای دەستلەکارکێشانەوەی سێر ئەلێکس فێرگسن، تێن هاخ بووە پێنجەم راهێنەر، ئەرکی مەشقی شەیتانە سوورەکان لەئەستۆ بگرێت.

تێن هاخ لە ئۆکتۆبەر/تشرینی یەکەمی رابردوو، سەرەڕای نوێکردنەوەی گرێبەستەکەی لە هاوینی رابردوو، لە پۆستەکەی دوورخرایەوە.

ئامۆریم لە سەرەتای مانگەوە، کارەکانی لەگەڵ مان یونایتد دەستپێکردووە و لە یەکەم تاقیکردنەوەیدا، بە ئەنجامی 1-1 بە ئیپسویچ تاون یەکسانبوو.

مان یونایتد ئەمشەو لە یۆرۆپالیگ رووبەڕووی یانەی بۆدۆ دەبێتەوە.