کانسێلۆ: خولی سعودی بەو شێوەیە نەبوو کە بیرم لێدەکردەوە

یاریگا –

جواو کانسێلۆ، بەرگریکاری راستی پورتوگالی هیلال، پێش یاری هەڵبژاردەی پورتوگال بەرامبەر کرواتیا لە خولی نەتەوەکانی ئەوروپا، لێدوانی سەرنجڕاکێشی سەبارەت بە ئەزموونی خۆی لە خولی رۆشەنی سعودی دا.

کانسیلۆ لە کۆنگرە رۆژنامەوانییەکەیدا سەبارەت بە جیاوازیی نێوان خولی رۆشەن و خولە ئەوروپییەکان گوتی:

پێموابوو خولی سعودیە لاوازترە لەوەی ئێستا دەیبینم، بەڵام کاتێک پەیوەندیم بە هیلالەوە کرد، درکم بە راستییەکان کرد. رەنگە هەندێک لەم بابەتە تێنەگەن، چونکە لێرە یارییان نەکردووە، بەڵام بوونی من لە هیلال روانگەی منی بە تەواوی گۆڕی. ئەم خولە پڕە لە ئەستێرە و هەموو وەرزێک بەرەو باشتر دەڕوات.

هەروەها کانسێلۆ ئاماژەی لە درێژەی قسەکانی گوتی:

راستە خولەکانی ئەوروپا لە رووی کوالیتیەوە لەسەرترن، بەڵام خولی سعودیە بە خێراییەکی زۆر گەشە دەکات و هەموو وەرزێک یاریزانی نوێ لە یانە گەورەکانی جیهان پەیوەندی پێوە دەکەن.

کانسێلۆ لە سەرەتای ئەم وەرزەدا بە بڕی 25 ملیۆن یۆرۆ لە مانچێستەر سیتیەوە پەیوەندی بە هیلال کرد.