چوونی کێیزا بۆ چێڵسی پەیوەستە بە یاریزانێکی بلووزەوە
رەحیم ستێرلینگ لەناو هاوکێشەکەدایە
یاریگا –
یانەکانی چێڵسی و یوڤێنتوس چاوەڕێی گڵپۆپی سەوزی یەکترن و هەردوو یاریزان فێدێریکۆ کێیزا و رەحیم ستێرلینگیش لە هەمان دۆخدان لەگەڵ یانەکانیان.
لە میانی یارییە دۆستانە ئامادەکارییەکان بوو کە تیاگۆ مۆتا بە فەرمی رایگەیاند فێدێریکۆ کێیزا لە پلانەکانیاندا نابێت بۆ ئەم وەرزە و بە بانبهێشتنەکردنی بۆ یارییەکان، دەرگای چوونەدەرەوەی لێکردەوە.
بەگوێرەی نوێترین زانیاریی کە جیانلوکا دی مارزیۆی رۆژنامەنووسی ئیتاڵی بڵاویکردووەتەوە، چێڵسی دەیەوێ گرێبەست لەگەڵ کێیزا واژۆبکات بەڵام سەرەتا دەیانەوێ دەستبەرداری ستێرلینگبن.
🚨 Chelsea want to sign Federico Chiesa, but first they must get rid of Raheem Sterling. 💙🇮🇹
(Source: @DiMarzio) pic.twitter.com/KiyzeLcuxq
— Transfer News Live (@DeadlineDayLive) August 19, 2024
لەولاشەوە دۆخی رەحیم زۆر جیاوازتر نییە لە فێدێریکۆ، بەوپێیەی ئەویش بۆ یەکەم یاریی وەرزەکە لەلایەن ئینزۆ مارێسکای راهێنەرەوە بانگهێشت نەکرا بۆ رووبەڕووبوونەوە قورسەکەی مان سیتی کە 0-2 بە میوانەکەیان دۆڕاند.
ئەگەرچی دوای یارییەکە راهێنەرە ئیتاڵییەکە ناچاربوو بۆ وەڵامدانەوەی نوێنەرەکانی ستێرلینگ روونکردنەوە بدات:
بۆچی رەحیم ستێرلینگ لە پێکهاتەی چێڵسی دوورخرابووەوە؟ راهێنەرەکەیان وەڵام دەداتەوە
کێیزا کە ساڵی 2022 لە فیورێنتیناوە گواسترایەوە یوڤێنتوس، بە یەکێک لە رەگەزە دیار و کاریگەرەکانی ئەو یانەیە دادەنرێت. وەرزی رابردوو لە سێریائەی لە 33 یارییدا توانی 9 گۆڵ بکات لەگەڵ دوو ئەسیست.
ماوەیەکیشە دەنگۆ هەیە خانمەپیرەکە چاوی لە تواناکانی ئەو یاریزانە ئینگلیزیەیە کە وەرزی رابردوو لە 31 یاری پرێمەرلیگدا بەشداریی 12 گۆڵی کرد (8 گۆڵ و 4 ئەسیست).
ئێستا زەمینە بۆ هەردوو یانە لەبارە بۆ دەستکەوتنی یاریزانی دڵخوازی خۆیان.
