وادەی سزادانی مانچێستەر سیتی بەهۆی 115 سەرپێچی دارایی دەستنیشانکرا

یاریگا –

وادەی گوێگرتن لە 115 سەرپێچییەکانی داراییەکانی مانچێستەر سیتی دیاریدەکرێت.

بڕیاربوو لە کۆتاییەکانی نۆڤێمبەر/تشرینی دووەمی ئەمساڵ، کۆمسیۆنەکی سەربەخۆ، گوێ لە وەڵامی مانچێستەر سیتی، لەبارەی تۆمەتی 115 سەرپێچییە دارایی بگرێت، بەڵام بەگوێرەی راپۆرتێکی رۆژنامەی تایمز، وادەی گوێگرتنەکە لە ناوەڕاستی مانگی داهاتوو دەبێت.

رۆژنامەکە بڵاویکردووەتەوە، مانگی داهاتوو، گوێ لە وەڵامی مانچێستەر سیتی لەبارەی 115 سەرپێچییەکە دەگیرێت و پێشبینی دەکرێت، ساڵی داهاتوو بڕیاری کۆتایی لەسەر کەیسەکە بدرێت.

لە ئەگەری تاوانباربوونی مان سیتی بە شکاندنی رێساکانی پرێمەرلیگ، رەنگە ژمارەیەکی زۆری خاڵی لێ کەمبکرێتەوە، تەنانەت هەندێ سەرچاوەی رۆژنامەوانی باس لە دابەزینی بۆ چامپیۆنشیپ دەکەن.

115 سەرپێچییە داراییەکەی مانچێستەر سیتی چین؟

54 سەرپێچی شکستهێنان لە پێشکەشکردنی زانیاری دارایی ورد و نوێکراو لە وەرزی 2009-10 تاوەکو 2017-18.

14 سەرپێچی شکستهێنان لە پێشکەشکردنی راپۆرتی دارایی بۆ قەرەبووکردنەوەی یاریزانان و راهێنەران لە وەرزی 2009-10 تاوەکو 2017-18.

5 سەرپێچی بەهۆی پابەندنەبوون بە رێساکانی یەکێتیی تۆپی پێی ئەوروپا، لەوانە یاسای پەیوەست بە مۆڵەتی یانەکان و رێساکانی یاریی خاوێن.

7 سەرپێچی لە یاساکانی قازانج و بەردەوامیی پرێمەرلیگ لە وەرزی 2015-16 تاوەکو 2017-18.

35 سەرپێچی شکستهێنان لە هەماهەنگی لێکۆڵینەوەکانی پرێمەرلیگ لە دیسێمبەر/کانوونی یەکەمی ساڵی 2018 تاوەکو ئێستا.