دۆرتموند یاریزانێکی گواستەوە و ئەستێرەیەکیش یانەکەی جێهێشت

یاریگا –

بۆڕووسیا دۆرتموند گواستنەوەی یان کۆوتۆ، بەرگریکاری مانچێستەر سیتی دووپاتکردەوە و نیکلاس فوڵکروگیش، یانەکە جێدەهێڵێت.

دۆرتموند لە بەیاننامەیەکدا، بەخێرهاتنی بەرگریکارە بەڕازیلییەکەی کرد و روونیکردەوە، تاوەکو هاوینی ساڵی داهاتوو، کۆوتۆ بە خواستن یاری بۆ زەردەواڵەکان دەکات و بژاردەی گرێبەستی هەمیشەییش باسکراوە.

Bem vindo a família, Yan! 🖤🇧🇷💛 pic.twitter.com/lG72BYe1eE

— Borussia Dortmund (@BlackYellow) August 3, 2024

بەر لە راگەیاندنی گرێبەستە نوێیەکە، دۆرتموند هەواڵی چوونە دەرەوەی نیکلاس فوڵکروگ، هێرشبەری ئەڵمانی بڵاوکردەوە، بەبێ ئەوەی باسی یانەی داهاتووی بکات، بەڵام بەگوێرەی زانیارییەکان، فولکڕوگ لە وێستهام یونایتد نزیکە.

Niclas Füllkrug has left training camp in Switzerland on Saturday morning. Borussia Dortmund have allowed the striker to leave for talks with another club. pic.twitter.com/hBmgNM9BEM

— Borussia Dortmund (@BlackYellow) August 3, 2024

کۆوتۆ یەکەم یاری نێودەوڵەتی لە ئۆکتۆبەر/تشرینی یەکەمی ساڵی 2023 لەگەڵ هەڵبژاردەی بەڕازیل کرد و تاوەکو ئێستا چوار یاری نێودەوڵەتی هەیە. کۆوتۆ لە دوو وەرزی رابردوودا بە خواستن یاری بۆ جیڕۆنا کرد و خۆی وەک یەکێک لە باشترینەکانی لالیگا پیشاندا.

یاریزانی تەمەن 22 ساڵان، لە ساو پاولۆوە گەشتی زیورخی کرد و پشکنینی پزیشکی کرد، دواتر پەیوەندی بە کەمپی مەشقی دۆرتموندەوە کرد.

کۆوتۆ درێسی ژمارە 2 لەگەڵ دۆرتموند دەپۆشێت و ئەمڕۆ مەشقەکانی دەستپێدەکات.

کۆوتۆ لە ساڵی 2020 پەیوەندی بە مان سیتییەوە کرد، بەڵام بەهۆی بوونی رکابەری توند لەسەر پێکهاتەی سەرەکی، کۆوتۆ بە خواستن یاری بۆ جیڕۆنا کرد و یارمەتی یانە ئیسپانییەکەیدا، بگاتە چامپیۆنزلیگ.