کاڵڤن فیلیپس فشارێکی زۆر لە مانچێستەر سیتی دەکات

یاریگا –

کاڵڤن فیلیپس بەردەوامە لەدروستکردنی فشار لەسەر دەستەی کارگێڕی مانچێستەر سیتی.

لەدوای شکستهێنانی لە مسۆگەرکردنی شوێنێک لە پێکهاتەی سەرەکی پێپ گواردیۆلا، ئێستا کاڵڤن فلیپس هەموو هەوڵێک بۆ جێهێشتنی یانەکە دەدات.

فیلیپس لە ناوەڕاستی وەرزی رابردوو، بە خواستن پەیوەندی بە وێستهام یونایتد کرد و ئێستا سەرنجی تەواوی لەسەر جێهێشتنی یانەکەی باکووری بەریتانیا داناوە.

فووتبۆڵ ئینسایدەر بڵاویکردووەتەوە، مان سیتی ئامادەیە بەبڕی 20 ملیۆن پاوەند، رێگە بە چوونە دەرەوەی ئەستێرە ئینگلیزییەکە بدات.

ئێڤەرتن و ئاستۆن ڤیلا لە نزیکەوە چاودێری دۆخی فیلیپس دەکەن، بەڵام بەگوێرەی فووتبۆڵ ئینسایدەر بێت، هەردوو یانەکە دەیانەوێت بە خواستن یاریزانەکەی مان سیتی بگوازنەوە.

فیلیپس لە هاوینی ساڵی 2022 بەبڕی 42 ملیۆن پاوەند، لە لیدز یونایتدەوە پەیوەندی بە سیتی کرد، بەڵام لەوساتەوە تەنیا بەشداری لە 31 یاریدا کردووە و 17 جار وەک یاریزانی یەدەک بووە.

سەرەڕای تەواوکردنی وەرزی رابردوو بەخواستن لەگەڵ وێستهام یونایتد، بەڵام فیلیپس بانگهێشتی یۆرۆی 2024 نەکرا.

فیلیپس فشارێکی زۆری لەسەر مان سیتی دروستکردووە، تاوەکو بە هەمیشەیی رێگە بەچوونە دەرەوەی بدرێت.