بارسێلۆنا کار لەسەر گواستنەوەی دوو ئەستێرەی گەورە دەکات

یاریگا –

بارسێلۆنا خەریکە هەمووان شۆک دەکات و ئامادەکاری بۆ راگەیاندنی دوو گرێبەستی گەورە دەکات.

رۆژنامەی سپۆرت لە ژمارەی ئەمڕۆیدا بڵاویکردووەتەوە، بارسێلۆنا هەموو هەوڵەکانی بۆ گواستنەوەی نیکۆ ویڵیامس، هێرشبەری ئاتلێتیک بیلباو و دانی ئۆلمۆ، یاریزانی لایپزیگ چڕکردووەتەوە.

دەمێکە ناوی ویڵیامس بە بارسێلۆنا بەستراوەتەوە، بەڵام بۆ یەکەمجارە رۆژنامەیەکی نزیک لە بارسێلۆنا باس لە گواستنەوەی ئۆلمۆ بکات.

یاریزانە ئیسپانییەکە لە هاوینی رابردوودا گرێبەستەکەی لەگەڵ لایپزیگ تاوەکو هاوینی 2027 نوێکردەوە، بەڵام بەگوێرەی مەرجێکی گرێبەستەکە، هەر یانەیەک یاریزانە ئیسپانییەکەی بوێت، ئەوا بەر لە 15ی ئەم مانگە یۆلیۆ-تەمووز دەتوانێت بە بڕی 60 ملیۆن یۆرۆ بیگوازێتەوە. وادەکە بەسەرچووە، بەڵام بەهۆی بردنەوەی نازناوی یۆرۆ لەگەڵ هەڵبژاردەی ئیسپانیا، وادەکە بۆ 20ی ئەم مانگە درێژکراوەتەوە و بارسا دەتوانێت بە 60 ملیۆن یۆرۆ بیگوازێتەوە.

لەلایەکی دیکەوە، بارسێلۆنا کار لەسەر دابینکردنی 58 ملیۆن یۆرۆ بۆ گواستنەوەی ویڵیامس دەکات. دێکۆ خەریکی رازیکردنی یاریزانەکانە و خوان لاپۆرتاش هەوڵی چارەسەرکردنی کێشەکانی دارایی دەدات.

دانی ئۆلمۆ پێشتر لە تیمی لاوانی بارسێلۆنا یاریکردووە، رۆژنامەکە ئاشکرای دەکات، ئۆلمۆ هاندەرێکی سەرسەختی بارسایە و دەیەوێت بگەڕێتەوە یانەکە.

هانسی فلیک، راهێنەری بارسێلۆنا داوای گواستنەوەی یاریزانێکی باڵی چەپی لە دەستەی کارگێڕی یانەکەی کردووە. هەریەکە لە ئۆلمۆ و ویڵیامس لە بازنەی داواکارییەکانی فلیکدان.

ئۆلمۆ دوو نازناوی جامی ئەڵمانیا و نازناوێکی جامی سوپەری ئەڵمانیاشی لەگەڵ لایپزیگ بەدەستهێناوە، ئەستێرەکەی لافۆریا رۆخا 145 یاری لەگەڵ لایپزیگ کردووە، 29 گۆڵی هەیە و 34 گۆڵیشی درووستکردووە.