یاریگا –
تەلال بلوشی، ڕاهێنەری یانەی زاخۆ پێی وایە ڕکابەریکردن لەسەر پله‌كانی پێشەوه‌ی ریزبه‌ندی لە خولی ئه‌ستێره‌كانی عێراق مافێکی ڕەوای تیپەکەیه‌تی.
تەلال بلوشی قه‌ته‌ری ڕاهێنەری یانه‌ی زاخۆ، لە میانی کۆنگرەیه‌كی ڕۆژنامەوانی دوای یارییەکەیان به‌رامبه‌ر میینا رایگەیاند، زاخۆ مافی ڕەوای خۆیه‌تی ڕکابەری لەسەر پلەكانی پێشه‌وه یاخود یەکەمی خوله‌كه بکات، تیپێكی به‌هێزمان هه‌یه و هەمیشە گۆڵمان لە یارییەکاندا تۆمارکردووە.
بلوشی ئاماژەی بەوەشکرد، له یارییمان به‌رامبه‌ر میینا لە گێمی یەکەمدا ئاستێکی باشمان پێشکەشکرد و ئەوەی ویستمان بەدەستمان هێنا ، كارته سوره‌كه‌ی یاریزانی تیپه‌كه‌مان تاڕادەیەک حیساباتی ئێمەی شێواند، بەڵام سوپاسی سەرجەم یاریزانەکان دەکەم بۆ ئاستیان و جێبەجێکردنی ڕێنماییەکان، هەروەها سوپاسی هاندەرانی خۆشەویستی زاخۆ دەکەم بۆ بەردەوامبوونیان له هاندانی تیپەکە.
زاخۆ لە لە گەڕی 25ی خولی ئەستێرەکانی عێراق ، بە ئەنجامی 3-1 لە میینای میوانی بردەوە، بەم سەرکەوتنە زاخۆ خاڵه‌كانی بۆ 43 خاڵ بەرزکردەوە و لە پلەی سێیەمی ڕیزبەندیه ، بە جیاوازی گۆڵ له پێش یانه‌ی زه‌ورایه کە پلەی چوارەمی گرتووه.
