یاریگا –
میکێل ئارتێتا ڕاهێنەری یانەی ئارسناڵ پێی وایە سەرکەوتنی ئه‌مشه‌ویان لە دێربی لەندەن بەرامبەر چێڵسی فشارەکانی سەر مانچێستەر سیتی و لیڤەرپوول زیاتر دەکات.
ئه‌مشه‌و له یاریگای ئیمارات ئارسیناڵ له یارییه‌كی دواخراوی گه‌ڕی 29 میوانداری یانه‌ی چێلسی ده‌كات.
ئارسناڵ بەشێوەیەکی کاتی لە پێشەنگی خولی ئینگلیزییە و بە کۆکردنەوەی 74 خاڵ، بە جیاوازی گۆڵ لە پێش لیڤەرپوولەوە و بە خاڵێک لە پێش مانچێستەر سیتیه، به‌ڵام مان سیتی دوو یاری دواخراوە بەرامبەر برایتن و تۆتنهام هه‌یه و لیڤەرپوڵیش یارییەکی دواخراوی بەرامبەر ئێڤەرتن هەیە.
ئارتێتا لە لێدوانێکدا کە ڕۆژنامەی میرۆری ئینگلیزی بڵاویکردووەتەوە، دەڵێت: ئه‌نجامدانی یارییه‌كانت پێش یانه‌كانی تر بەڕاستی یارمەتیدەرە، چونکە کاتێک سەردەکەویت، فشاره‌كان كه‌متر ده‌بنه‌وه.
ئاماژەی بەوەشکرد، هەوڵی دووبارە بردنه‌وه ده‌ده‌ین و ده‌مانه‌وێت ئاستێكی به‌رز پێشكه‌ش بكه‌ین و سەرکەوتن بەدەستبهێنین، ئەگەر بتوانین ئەوە بکەین، بەدڵنیاییەوە فشارەکان بۆ سه‌ر مانچێسته‌ر سیتی و لیڤه‌رپوول زیاتر دەبن.
زیاتر گوتی، سەرسامم بە پۆچێتینۆ ، هیوای سەرکەوتنی بۆ دەخوازم، ئەو راهێنەرێکی گەورەیە و سەرکردەیەکی گەورەیە و سەرکردایەتی چێڵسی دەکات بۆ ئەوەی بگاتە ئەو شوێنەی کە هه‌وڵی بۆده‌ده‌ن.
گوتیشی، چێڵسی پێشکەوتنێکی گەورەی به‌خۆییه‌وه بینیوه، شایەنی ئەوەیە لە پێگەیەکی زۆر بەرزتردا بن، پێموایە ئەوەی پۆچێتینۆ دەیکات سەرنجڕاکێشە.
