بێنزێما لە دژی وەزیری ناوخۆی فەرەنسا سکاڵا تۆمار دەکات

یاریگا –

کەریم بێنزێما، ئەستیرەی یانەی ئیتیحادی سعودی، بەهۆی لێدوانەکانی وەزیری ناوخۆی فەرەنسا لە مانگی تشرینی یەکەمی رابردوودا، سکاڵایەکی فەرمی لەدژی تۆمارکرد.

بەگوێرەی میدیای فەرەنسی French24، کەریم بێنزێما سکاڵای لەدژی وەزیری ناوخۆی فەرەنسا، جیراڵد دارمانین تۆمار کردووە. لە مانگی تشرینی یەکەمی ساڵی ڕابردوودا، دارمانین گوتبووی، ئەم یاریزانە پەیوەندی بە ئیخوان موسلیمین، کە رێکخراوێکی ئیسلامییە، هەیە.

هیو ڤیجیێر، پارێزەری بێنزێما، سکاڵاکەی لە دادگای دادی کۆمار (CJR) تۆمارکردووە، کە تاکە دادگایە لە وڵاتدا بۆ دادگاییکردنی ئەندامانی حکومەت. بەگوێرەی ئەو راپۆرتە میدیاییە، ئەم سکاڵایە لە 92 لاپەڕەدا داڕێژراوە و تێیدا دەگوترێت کەریم بێنزێما قوربانی تێوەگڵاندنی سیاسەتە کە لێدوانەکانی وەزیر کاریگەری نەرێنی نەک تەنها لەسەر ناوبانگی کەریم، بەڵکو لەسەر کەسوکار و ئەندامانی خێزانەکەی درووست کردووە.

گەر دادگا سکاڵاکا پەسەند بکات ئەوا وەزیر تۆمەتبار دەکرێت و دەبێت بڕی 12000 یۆرۆ وەکوو پێبژاردن بدات.

ئەم لێدوانەی جێراڵد دو دارمانین، دوای ئەوە هات کە کەریم بێنزێما هێرشی ئیسرائیلییەکانی بۆ سەر غەززە بە شەرمەزاری ناوبرد و پشتیوانی لە فەلەستینییەکان کرد.