ئاراوخۆ وەڵامی دەنگۆکان دەداتەوە

یاریگا

بارسێلۆنا شەوی داهاتوو لە قۆناغی پێشکۆتایی جامی سوپەری ئیسپانیا، ڕووبەڕووی ئۆساسۆنا دەبێتەوە. ڕۆناڵد ئاراوخۆ بەرگریکاری بلاوگرانا پێش ئەم یارییە لە کۆنگرەی ڕۆژنامەوانیدا لەگەڵ چاڤی دەرکەوت و باسی چەندین بابەتی جیاوازیان کرد. بەرگریکارە ئۆرگواییەکە سەرەتا باسی لەو دەنگۆیانە کرد کە گوایە یانەی بایرن میونشنی ئەڵمانیا، هەوڵی گواستنەوەی دەدات و لەمبارەوە گووتی

لە هەموو پەنجەرەیەکی گواستنەوەدا چیرۆکێکی نوێ لەسەر من دروست دەبێت، هاوینی ڕابردوو باسی مانچستەر یونایتدیان دەکرد. من هەموو سەرنجم لەسەر یانەکەمە و نامەوێت بیر لەم بابەتە بکەمەوە. لە دۆخێکی باشدام لەگەڵ یانەکەم و شانازی بە بەستی نیشانەی کاپتنی دەکەم و ئەمەش گەورەترین شانازیە بۆ من

ئاراوخۆ لە بەشێکی دیکەی قسەکانیدا لەبارەی ئاست و ئەنجامەکانی یانەکەی دەڵێت

ئێمە لە ماوەی رابردوو کارمان لەسەر هەڵەکانمان لە هێلی بەرگری کردووە، دەمانەوێت لە داهاتوو کەمترین گۆڵمان لێبکرێت، ئۆساسۆنا تیپێکی بەهێزە و هەموو هەوڵێک دەدەین باشترین ئاست پێشکەش بکەین، لەوەتەی چاڤی بووەتە راهێنەری یانەکەمان، فێری ئەوە بوین لە هێلی بەرگریەوە یارمەتی هێرشبەرەکانمان بدەین، لە رووی دەرونیەوە زۆر باشین و دەمانەوێت هاوشێوەی جامەکانی دیکە، گرنگی بەم جامەش بدەین