ریال مەدرید پلانی جێگرەوە بۆ ئێمباپێ و هالاند دادەنێت

یاریگا –

ریال مەدرید پلانێکی دیکەی بۆ گواستنەوەی هاوینەی داهاتوو داڕێشتووە، دوور لە ئێرلینگ هالاند، هێرشبەری مانچێستەر سیتی و کیلیان ئێمباپێ، هێرشبەری پاریس سانجێرمان.

رۆژنامەی سپۆرت بڵاویکردووەتەوە، ریال مەدرید نایەوێت سیناریۆکانی پێشوو دووبارە بکاتەوە، ئەمجارەیان دوور لە هالاند و ئێمباپێ پلانی بۆ گواستنەوەی ڤیکتۆر ئۆسیمین، هێرشبەری ناپۆلی داڕێشتووە.

رۆژنامەکە دووپاتیکردووەتەوە، فلۆرێنتینۆ پێرێز لە نزیکەوە چاودێری کەیسی گواستنەوەی یەکێک لەم سێ یاریزانە دەکات، چونکە پێی وایە ریال مەدرید پێویستی بە خەرجکردنی پارەیەکی زۆری لە هاوینی داهاتوو هەیە.

تاوەکو ئێستا ئۆسیمین گرێبەستەکەی لەگەڵ ناپۆلی نوێنەکردووەتەوە، بەڵام ماوەیەکە گفتوگۆکانیان دەستیپێکردووە و رەنگە ئەستێرە نایجێرییەکە تاوەکو 2028 گرێبەستەکەی لەگەڵ پارتێنۆپی نوێبکاتەوە.

بەگوێرەی راپۆرتێکی لاگازێتا دێلۆ سپۆرت ئۆسیمین لەسەر نوێکردنەوەی گرێبەستەکەی رازیبووە، بەڵام چاوی لە یانە گەورەکانی ئەوروپایە. مەرجی هەڵوەشاندنەوەی گرێبەستی ئۆسیمین لە ناپۆلی دەگاتە 130 ملیۆن یۆرۆ.

پێرێز گەیشتووەتە ئەو بڕوایەی، لە چەند ساڵی داهاتوودا، جود بێڵینگهام، پێویستی بە پاڵپشتی هەمە چەشن لە نێو یاریگادا هەیە، بۆیە لە ئێستاوە کار بۆ پڕکردنەوەی پێویستییەکان دەکات.

ئەمشەو یەکشەممە، ریال مەدرید لە یاریگای سانتیاگۆ بێرنابیۆ میوانداری ڤیاڕیال دەکات.