لیڤەرپوول 70 ملیۆن یۆرۆ بۆ ئەستێرەیەکی لیڤەرکوزن تەرخان دەکات

یاریگا –

لیڤەرپوول واز لە یاریزانانی بۆندسلیگا ناهێنێت و ئەمجارە هەوڵی گواستنەوەی ئەستێرەیەکی بایەر لیڤەرکوزن دەدات.

پیێرۆ هینکاپیێ، یاریزانی بایەر لیڤەرکوزن بووەتە جێگەی سەرنجی چەندین یانەی پرێمەرلیگ و سێریا ئەی. رۆژنامەی بیڵد روونیکردووەتەوە، لیڤەرپوول لە نزیکەوە چاودێری هینکاپیێی تەمەن 21 ساڵان کردووە، هەرچەندە لەلایەن یانەکانی نیوکاسڵ، ئەیسی میلان و رۆماشەوە چاودێری دەکرێت.

رۆژنامەکە بڵاویکردووەتەوە، نرخی هەڵوەشاندنەوەی گرێبەستی هینکاپیێ، یاریزانی نێودەوڵەتی ئێکوادۆری دەگاتە 70 ملیۆن یۆرۆ و گرێبەستەکەی لە هاوینی ساڵی 2027 بەسەر دەچێت.

هینکاپیێ یەکێکە لە ئەستێرەکانی بایەر لیڤەرکوزن و دەتوانێت بژاردەی جیاواز بە یۆرگن کڵۆپ بدات، بە تایبەت لە ماوەی رابردوودا، رێدز کێشەی زۆری لە هێڵی بەرگریکدا هەبووە و پیێرۆ دەبێتە پاڵپشتیکارێکی گەورە بۆ بەرگریکارانی رێدز.

ئێستا هەریەکە لە ئاندری رۆبێرتسن و جۆیڵ ماتیپ، پێکانیان هەیە و لیڤەرپوول لە هەموو کاتێک زیاتر پێویستی بە بەرگریکارە، تاوەکو رکابەری لەسەر نازناوەکانی ئەم وەرزە بکات.

لیڤەرپوول سبەی یەکشەممە لە یاری کلاسیکۆی ئینگلتەرا، لە ئاینفیڵدڕۆد پێشوازی لە مانچێستەر یونایتد دەکات.