فایزە مەعماری چیدیکە ناتوانێت وەک بریکاری ئێمباپێ کار بکات
یاریگا –
خەریکی گۆڕانکارییەکی زۆر بەسەر داهاتووی کیلیان ئێمباپێ، ئەستێرەی هەڵبژاردەی فەرەنسا و پاریس سانجێرمان دێت.
لە چەند ساڵی رابردوودا، چارەنووسی ئێمباپێ بەردەوام جێگەی مشتومڕی میدیاکان بووە، لەم دوو ساڵەدا، ناوی بەردەوام بە ریال مەدرید بەسترابووەوە، بەڵام تاوەکو ئێستا ئێمباپێ هەر لە پاریس ماوەتەوە.
هەرکاتێک باسی چارەنووسی ئێمباپێ دەکرێت، ناوی فایزە مەعماری، دایک و بریکارەکەی دێتە بەرباس. هەمووان دەزانن مەعماری خاوەن دوا قسەیە لە بڕیاردان لە چارەنووسی ئێمباپێ.
رۆژنامەی مارکا راپۆرتێکی گرنگی لەبارەی داهاتووی ئێمباپێ بڵاوکردەوە، ئێستا فایزە مەعماری دایکی ناتوانێت نوێنەرایەتی یاخود قسەکردن بە ناوی ئەستێرەکەوە بکات.
🇫🇷 Kylian Mbappé tendrá que buscarse nuevo agente
⚽ Fayza Lamari, su madre y ahora agente, no tiene la licencia requerida tras la nueva legislación según se puede comprobar en la FIFA Agent Platform
🖋 Nos lo cuentan @jfelixdiaz y @nacholabarga 👇
https://t.co/273CgYOl4v— MARCA (@marca) October 12, 2023
رۆژنامەکە دەڵێت، لە ماوەی رابردوودا فێدراسیۆنی تۆپی پێی نێودەوڵەتی ‘فیفا’ گۆڕانکاری گەورەی لە پێدانی مۆڵەت بە بریکارانی یاریزانان کردووە.
لە لیستە نوێیەکەی بریکاری یاریزاناندا، ناوی فایزە مەعماری تێدانییە، ئەمەش کێشە بۆ دایکی ئێمباپێ دروست دەکات.
مەعماری مۆڵەتی بریکاری نەماوە و تاوەکو کۆتایی مانگی ئایاری ساڵی داهاتوو، ناتوانێت مۆڵەتەکە بەدەستبهێنێت، چونکە پێویستە تاقیکردنەوە بکات.
بە فەرمی مەعماری چیدیکە ناتوانێت ببێتە بریکاری ئێمباپێ و ئەگەر ئەم کارە بکات، ئەوا هەر کەسایەتییەکی نێو کەرتی وەرزشی سکاڵای لێبکات، ئەوا رووبەڕووی سزای توندی دارایی دەبێتەوە.
رۆژنامە ئیسپانییەکە نووسیویەتی، ئێستا ئێمباپێ خەریکی گەڕانە بە دوای بریکارێک، تاوەکو لە ماوەی داهاتوودا، بتوانێت بە باشترین شێوە مامەڵە لەگەڵ دۆخەکە بکات. بە تایبەت کەمتر لە ساڵێکی دیکە گرێبەستەکەی لەگەڵ پاریس بەسەردەچێت.
بە چوونەدەرەوەی مەعماری لە گفتوگۆکان، رەنگە گۆڕانکاری گەورە بەسەر داهاتووی ئێمباپێ بێت، چونکە دایکی ئێمباپێ بەردەوام خاڵی سەرەکی گفتوگۆکان بووە و بە هۆکارێکی مانەوەی کیلیان لە پاریس دادەندرێت.
