یاریگا –
كارلۆ ئانچێلۆتی، راهێنەری ئیتاڵی یانەی ریال مەدریدی ئیسپانی هەواڵێكی دڵخۆشكەری پێگەیشت سەبارەت بە گەڕانەوەی ڤینیسیۆس جونیۆر ئەستێرەی سامبا و یەكێك لە كۆڵەكە سەرەكیەكانی پێكهاتەكەی.
وا بڕیارە سبەی چوارشەممە كاتژمێر 20:00 لە یاریگای سانتیاگۆ بێرنابیۆ ریال مەدرید میوانداری لاس پاڵماس بكات، لە میانی یارییەكانی هەفتەی حەوتەمی لالیگای ئیسپانیا.
بەپێی زانیارییەكانی رۆژنامەی ماركا، لە دوای چاكبونەوەی لە پێكانەكەی ڤینیسیۆس جونیۆر بەشێوەیەكی ئاسایی بەرامبەر لاس پاڵماس بەشداری دەكات.
🚨 Vinicius will play vs Las Palmas. @marca pic.twitter.com/FTM1RRq7Fu
— Madrid Xtra (@MadridXtra) September 25, 2023
بەپێی زانیارییەكانی هەمان سەرچاوە، ڤینی ئامادەیە سەركردایەتی هێڵی پێشەوەی یانەكەی بكات دوای ماوەیەكی زۆر لە دابڕان.
بەهۆی پێكانێكی ماسولكەیی ماوەی زیاتر لە مانگێكە ئەستێرە بەڕازیلییەكە لە یاریگاكان دابڕاوە.
هەروەها لە یاری رابردووی مێرینگی بەرامبەر ئاتلێتیكۆ مەدرید بەهۆی ئەنفلۆنزای گەدەوە نەیتوانی بەشداری بكات.
مەدرید لە پلەی سێیەمی خولی ئیسپانیا دێت بە كۆكردنەوەی 15 خاڵ و بە جیاوازی خاڵێك لە دوای بارسێلۆنای پێشەنگ و جیرۆنای دووەمەوە دێت.
