بایرن میونشن دەستبەرداری پاڤارد دەبێت

یاریگا

بایرن میونشن ئامادەیە رێگە بە چوونی بێنیامین پاڤارد بەرگریکاری فەرەنسی یانەکەی بدات بۆ ئەوەی پەیوەندی بە یانەی ئینتەر میلان بکات.

گازێتا دیلۆ سپۆرت، جیانلوکا دی مارزیۆ و فابریزیۆ ڕۆمانۆ لە یەک کاتدا ڕێککەوتنی نێوان ئینتەرمیلان و بایرن میونشنیان سەبارەت بە گواستنەوەی بنیامین پاڤارد بۆ ئیتاڵیا ڕاگەیاند.

ئێستا ئینتەرمیلان چاوەڕێی بایرن میونشن دەکات بۆ ئەوەی جێگرەوەیەک بۆ بەرگریکارە فەرەنسییە تەمەن 27 ساڵەکە بدۆزێتەوە، پێش ئەوەی گرێبەستەکەی بە بڕی 30 ملیۆن یۆرۆ لەگەڵ 2-3 ملیۆن یۆرۆ وەک پاداشت کۆتایی پێبهێنێت.

چاوەڕێ دەکرێت پاڤارد کە پێشتر لەگەڵ یانەی نێرازۆری ڕێککەوتبوو، بڕیارە ڕۆژی سێشەممە یان چوارشەممە بگاتە ئیتاڵیا.