ریال مەدرید نرخێکی خەیاڵی بۆ ڤینیسیۆس دادەنێت

یاریگا

کارگێری یانەی ریال مەدریدی ئیسپانیا بەم زووانە گرێبەستی ڤینیسیۆس جونیۆر هێرشبەری بەڕازیلی یانەکەی نوێدەکاتەوە و نرخێکی خەیاڵیشی بۆ دادەنێت.

رۆژنامەی وەرزشی مارکای ئیسپانی بڵاویکردەوە، یانە شاهانە لەگەڵ یاریزانە بەڕازیلیەکەی رێکەوتووە و بڕیارە بەم زووانە گرێبەستەکەی تاوەکو وەرزی 2027 بۆ 2028 نوێ بکرێتەوە، هەروەها مەرجی هەڵوەشاندنەوەی گرێبەستەکەشی بە 1 ملیار یۆرۆ دەخەملێندرێت.

ڤینیسیۆس کە ساڵی 2025 گرێبەستەکەی لەگەڵ ریال مەدرید کۆتایی دێت، چاوەڕێ دەکرێت موچەکەشی بە شێوەیەکی بەرچاو زیاد بکرێت، ئەو یاریزانە ئێستا موچەی ساڵانەی 21 ملیۆن یۆرۆیە.

یاریزانە بەڕازیلیەکەی ریال مەدرید ساڵی 2018 بەرامبەر 45 ملیۆن یۆرۆ پەیوەندی بە یانە شاهانەکەوە کرد و لەو کاتەوە لەگەڵ یانەکەی بەشداری 225 یاریکردووە و خاوەنی 59 گۆڵ و 64 ئاسیستە.