یاریگا –
ئینتەر میلان بۆ دوا دوو یاری ئەم وەرزە، لۆگۆی سپۆنسەرێکی نوێ لەسەر درێسەکان دادەنێت.
نێرازۆری ئاشکرای کردووە، لەگەڵ کۆمپانیای پاراماونت+ کە لە بواری بەرهەمهێنانی فیلم و ستریمینگ کار دەکات، گەیشتووەتە رێککەوتن و بڕیارە لە یارییەکانی بەرامبەر تۆرینۆ لە سێریا ئەی و مانچێستەر سیتی لە چامپیۆنزلیگ لۆگۆی کۆمپانیاکە لەسەر درێسەکان دابنێت.
ئینتەر میلان و رۆما گرێبەستیان لەگەڵ کۆمپانیای دیجیتاڵ بیتس هەبوو، بەڵام بە هۆی دواکەوتنی پێدانی خەرجییەکان لەلایەن کۆمپانیاکەوە، هەردوو یانەکە لە مانگی ئەپریلی رابردووەوە، لۆگۆی کۆمپانیاکەیان لەسەر درێسەکان لابردووە، هەرچەندە لە سێپتێمبەری ساڵی 2021 گرێبەستیان بە بەهای 85 ملیۆن یۆرۆ واژۆ کردبوو.
ئینتەر میلان لە هەردوو یاری چوون و گەڕانەوەی قۆناخی پێشکۆتایی چامپیۆنزلیگ لە بەرامبەر ئەیسی میلان، بەبێ بوونی لۆگۆی هیچ سپۆنسەرێک، درێسەکانیان پۆشی.
یانەکەی سیمۆنی ئینزاگی هەوڵدەدەن پلەی دووەمی سێریا ئەی بەدەستبهێنن، دواتر خۆیان بۆ یاری کۆتایی چامپیۆنزلیگ لە بەرامبەر مانچێستەر سیتی ئامادە بکەن، کە بڕیارە لە 10ی ئەم مانگە لە ئیستانبوڵ بەڕێوەبچێت.
