یاریگا
چاڤی هێرناندێز، راهێنەری یانەی بارسێلۆنا لە کۆنگرەی رۆژنامەوانی پێش یارییەکەی ئەم هەفتەیە بەرامبەر ریال سۆسیداد لە کۆنگرەی رۆژنامەوانی پێش یارییەکە گووتی هاندەرانی یانەکەیان دڵخۆشن بە دۆڕانی ریال مەدرید بەرامبەر مانچێستەر سیتی.
هاندەرانی بارسا بە دۆڕانی ریال مەدرید دڵخۆش بوون، بەڵام وەک پیشەگەر زیاتر دڵخۆشین بە بردنەوەی لالیگا. دۆڕانی مەدرید شتێکی سەرەکی نەبوو، بەڵام دڵخۆشی هاندەران بۆ ئێمە گرنگە. سیتی شایستەی ئەوە بوو بگاتە یاری کۆتایی، بە بڕوای من باشترین یانەی جیهانن.
چاڤی لە بارەی داهاتووی خۆی لەگەڵ یانەکەی لەسەر بابەتی نوێکردنەوەی گرێبەستەکەشی گووتی
دانوستانەکان لەسەر درێژکردنەوەی گرێبەستەکەم بەردەوامن. کێشەیەک دروست نابێت، هێشتا ساڵێکی ترم ماوە بۆ گرێبەستەکەم و بەڵێنتان پێدەدەم هەرگیز نابمە کێشە بۆ بارسا. ئەگەر ئەوە پەیوەندی بە منەوە بوایە بۆ هەمیشە لێرە دەمێنمەوە، بەڵام هەمووی پەیوەستە بە ئاست و ئەنجامەکانی تیپەکەوە.
راهێنەرەکەی بلاوگرانا لەبارەی ئەوەی سبەی بەرامبەر ئەو یاریزانە یاریی دەکات کە ئارەزووی گواستنەوەی بۆ یانەکەی دەکات دەڵێت
پێویستە هێڵی ناوەڕاستمان بەهێز بکەین، زۆبێمێندی یاریزانی سۆسیداد لەم پۆستەدا خەیاڵییە و زۆر باش لە یارییەکە تێدەگات، بە تۆپ یان بەبێ تۆپ زاڵە بەسەر هەموو شتێکدا. تا ئێستا لەگەڵ کەس قسەمان لەسەر ئەو یاریزانانە نەکردووە کە لە هاویندا دەڕۆن، بەڵام پلانمان هەیە و بەرهەممان دەبێت، بێگومان چوار یارییەکەی دیکەی لالیگا کاریگەری لەسەر داهاتووی هیچ یاریزانێک نییە.
بارسێلۆنا دوای مسۆگەر کردنی ناسناوی لالیگا، لە گەڕی 35 لالیگا کاتژمێر 22:00 بەکاتی هەولێر لە یاریگای سپۆتیفای کامپ نۆ میوانداری ریال سۆسیداد دەکات.
