یاریگا-
لیۆناردۆ ، بەڕێوەبەری وەرزشی یانەی پاریس سان جێرمانی فەڕەنسی هێرشدەكاتە سەر فلۆرینتینۆ پێرێزی سەرۆكی یانەی ڕیاڵ مەدریدی ئیسپانی دوای لێدوانەكانی دەربارەی كیلیان ئیمباپێ.
لیۆناردۆ لە لێدوانیدا بۆ ڕۆژنامەی لیكیپ ووتی: كۆتا لێدوانەكانی زنجیرەیەكی نوێیە لە بێڕێزیكردن بە پاریس.
هەروەها ووتیشی: لە كۆتا هەفتەدا كەریم بێنزیما و پێرێز و ئەنچیلۆتی دەربارەی ئیمباپێ قسەیانكردووە ، وەك ئەوەی كیلیان یاریزانێكی ئەوان بێت.
بەردەوام بوو ووتی: فلۆرینتینۆ پێرێز باسی ئیمباپێ دەكات بۆ هاندەرانیان ئەوە بێڕێزیەكە و ئێمە ڕێگە نادەین بەوە ، سەرەڕای ئەوەی گواستنەوەكان كۆتاییهاتووە و وەرز بەردەوامە و یاریەكان بەردەوامیان هەیە بۆیە نابێت ڕیاڵ مەدرید بەو شێوەیە ڕەفتار بكات.
لە كۆتایشدا ووتی: دەبێت بوەستن ، ئیمباپێ یاریزانی پاریس سان جێرمانە و یانەكە دەیەوێت ئەو پەیوەندیە بەردەوام بێت.
گرێبەستەكەی ئیمباپێ لەگەل پاریس لە هاوینی ساڵی 2022 بەسەردەچێت و تا ئێستاش ڕەتیدەكاتەوە گرێبەستەكەی نوێ بكاتەوە.
