پارێزەرەکەی ماڕادۆنا: کچەکانی خۆی پشتگوێیان خست نەک من
یاریگا-ماتیاس مۆرلا پارێزەری پێشووی دێیگۆ ئەرماندۆ ماڕادۆنای ئەفسانەی کۆچکردوو، هێرشدەکاتە سەر کچەکانی ئەو یاریزانە.
ماتیاس کە هاوڕێیەکی نزیکی ماڕادۆنابوو، بە بڕیاری دادگا لە نوێنەرایەتیکردنی موڵک و ماڵی ماڕادۆنا دوورخرایەوە پاش سکاڵای کچەکانی، بەڵام ئەو پێی وایە کارێکی گوماناوی لە ئارادایە لەلایەن کچەکانی و مەبەست لێی پارەیە..
لە ووتەیەکدا بۆ رۆژنامەی کلارینی ئەرژەنتینی ناوبراو وتی”ئەوەی ئەوان دەیڵێن لەسەر تاوانبارکردنی من بە کوشتنی ماڕادۆنا تەنها درامایە، ساڵێک تێپەڕیووە و هێشتا من دەستگیرنەکراوم، ئەمە هەڵمەتێکی فێڵبازانەیە ، کارەکانی داڵما و جیانیا (کچەکانی ماڕادۆنا) تەنها بۆ پارەیەو لەبەر ئەوەش دەیانویست من تۆمەتباربکەن و دووریان خستمەوە بەڵام ئەمە لە زیانی خۆیانە چونکە بۆ ئەوانیش وا باشتربوو من پارێزەری سامانەکەی بم، لە راستیدا ئەوان باوکیان پشتگوێ خست نەک من”.
داڵما و جیانیا، ماتیاس تۆمەتباردەکەن بە کوشتنی باوکیان چوونکە ئەو بەرپرس بوو لە رێکخستنی ئەو تیمە پزیشکییەی چاودێری تەندروستی ئەرماندۆیان دەکرد، دواتریش دەرکەوت بەهۆی کەمتەرخەمی دیمەکە ماڕادۆنا گیانی لەدەستداوە.
