یاریگا –
یانەی هەولێر، لە کاتێکدا خۆی بۆ وەرزی نوێی خولی ئەستێرەکانی عێراق و خولی یانە پاڵەوانەکانی کەنداو ئامادە دەکات، کەوتووەتە نێو گێژاوێکی قورسی یاسایی و دارایی.
بەپێی بەڵگەنامە نوێیەکان، کێشەی شایستە داراییەکانی یاریزانان بەرۆکی یانەکەی گرتووە و داهاتووی لە خولە ناوخۆیی و دەرەکییەکان خستووەتە ژێر پرسیارەوە.
شەپۆلی نوێی سکاڵاکان؛ شهش یاریزانی دیکە سكاڵایان كردووه
لە نوێترین پێشهاتدا، تۆڕی وەرزشیی یاریگا نووسراوێکی تایبهتی دهستكهوتووه، یەکێتیی تۆپی پێی عێراق كه واژۆی گۆڤهند عهبدولخاق ئهمینداری گشتی یهكێتیهكهی لهسهره شهش یاریزانی دیکە بە فەرمی سکاڵایان لەسەر یانەی هەولێر تۆمارکردووە و داوای شایستە داراییەکانیان دەکەن. ئەو یاریزانانەش بریتین لە:
1. ئوسامە جەبار
2. کاوە ئیبراهیم
3. هەڵۆ فایەق
4. محەمەد موحسین
5. ئیڤان خالید
6. عەلی رەحیم
ئەم شهش یاریزانە، بە پاڵپشتیی لیژنەی تەنفیزیی یەکێتیی تۆپی پێ، گوشارەکانیان بۆ سەر یانەکە چڕکردووەتەوە تاوەکو پێش دەستپێکی وەرزی نوێ، مافە داراییەکانیان وەربگرنەوە.
کێشە کۆنەکان هێشتا بە هەڵواسراوی ماونەتەوە
ئەم شەپۆلە نوێیەی سکاڵاکان لە کاتێکدایە کە یانەی هەولێر هێشتا نەیتوانیوە کێشەی چوار یاریزانی دیکە چارەسەر بکات کە پێشتر سکاڵایان تۆمارکردبوو.
فیدراسیۆنی تۆپی پێی عێراق داوای لە نوێنەری یانەکە کردووە لە بارەگای فیدراسیۆن ئامادە بێت بۆ یەکلاکردنەوەی کەیسی ئەو یاریزانانەی کە بریتین لە:
(ئەرکان ئەمیر ، رەوا یوسف ، زەیدان عەبدولجەبار ، زولفەقار یونس ).
بەمەش کۆی گشتی ئەو یاریزانانەی ئێستا کێشەی یاساییان لەگەڵ یانەکە هەیە دەگاتە 10یاریزان، ئەمەش بارگرانییەکی دارایی گەورە دەخاتە سەر شانی کارگێڕیی یانەکە.
كێشهكان چارهسهر نهكرێن مەترسییەکان چین؟
ئەم سکاڵایانە تەنیا کێشەیەکی دارایی سادە نین، بەڵکو هەڕەشەیەکی راستەوخۆن بۆ سەر یانەکە لە خولەکان:
1. خولی ئەستێرەکانی عێراق: بەپێی یاساکانی مۆڵەتدان هەر یانەیەک قەرزی یاریزانانی لەسەر بێت، مۆڵەتی بەشداریکردنی پێنادرێت.
2. خولی یانە پاڵەوانەکانی کەنداو: رێساکانی یەکێتیی تۆپی پێی ئاسیا و کەنداو زۆر توندن بەرامبەر بەو یانانەی پابەند نین بە گرێبەستەکانیان و ئهگهر چارهسهر نهكرێت له خولی یانه پاڵهوانهكانی كهنداو دووردهخرێتهوه.
کارگێڕیی هەولێر لەبەردەم تاقیکردنەوەیەکی سەختدا
ئێستا کات لە بەرژەوەندیی یانەی هەولێردا نییە، هاندەرانی یانەکە چاوەڕێی دەستوەردانی خێرا لەلایەن لایەنە پەیوەندیدارەکان و کارگێڕیی یانەکەوە دەکەن بۆ چاککردنی بارودۆخە داراییەکە.
ئەگەر یانەکە نەتوانێت لە چەند رۆژی داهاتوودا ئەم 10 کەیسە یەکلا بکاتەوە، لهوانهیه وەرزی 2026-2027 ببێتە یەکێک لە ناخۆشترین وەرزەکان بۆ مێژووی یانەی هەولێر.
