دوایین پێشهات؛ ئاستۆن ڤیلا پێویستی بە فرۆشتنی مۆرگان رۆجەرز هەیە؟

یاریگا – ئاتلێتیک

ئاستۆن ڤیلا زۆر بە توندی رەتی دەکاتەوە رۆجەرز لەدەست بدات، بەڵام رۆیشتنی ئەو دەکرێت یارمەتیدەر بێت لە نەهێشتنی نیگەرانییە دارایییەکانی یانەکە.

دوای ئەوەی لە وەرزی 2023-2024 سنووری رێگەپێدراوی زیانەکانیان تێپەڕاند بەپێی یاسای دەستکەوتەکانی تۆپی پێی یوێفا، کە لە بنەڕەتدا وەشانێکی توندتری ئەو سنوورەیە کە بڕیارە لە پرێمەرلیگ بۆ کۆی زیانەکانی یانەکان هەڵبوەشێنرێتەوە، ئاستۆن ڤیلا چووە نێو رێککەوتنێکی چارەسەرییەوە. مەرجەکانی ئەو رێککەوتنە جۆراوجۆر و سزادەرانەن؛ ئەگەر ڤیلا پێشێلی بکات، بۆ ماوەی یەک ساڵ لە پاڵەوانییەتییە ئەورووپییەکان دوور دەخرێتەوە.

دوورکەوتنەوە لەم دەرئەنجامە ئاسان نابێت. رێککەوتنەکە زیانەکانی ئاستۆن ڤیلای لە وەرزی 2025-2026 بۆ زۆرترین بڕی 60 ملیۆن یۆرۆ سنووردار کردووە و بۆ وەرزی 2026-2027ـیش نابێت هیچ زیانێک هەبێت، ئەگەرچی ئەو بڕە دەکرێت زیاد بکرێت بەگوێرەی ئەو بۆشایییەی کە ڤیلا لەژێر سنووری 60 ملیۆن یۆرۆی وەرزی رابردوودا هەیبوو.

ئەم زیادبوونە ئەگەرییە بێبایەخ دەبێت بەهۆی ئەو راستییەی کە لە وەرزی 2027-2028، هەڵسەنگاندن بۆ ئاستۆن ڤیلا دەکرێت لەسەر بنەمای زیانەکانی سێ وەرز لە ساڵی 2025 تاوەکوو 2027. ئاماری دەستکەوتەکانی تۆپی پێی ئەوان لە وەرزی 2024-2025، ساڵێک کە بۆ مەبەستەکانی یوێفا، زیانێکی 97 ملیۆن یۆرۆیی پێش باجیان هەبوو، دەخرێتە نێو هەڵسەنگاندنەکەوە.

یاسای دەستکەوتەکانی تۆپی پێ رێگە بە داشکاندنی خەرجییە ‘باشەکان’ دەدات و داشکاندنەکانی ڤیلا بەرچاون: بەگوێرەی هەژمارەکانی یانەکە، نزیکەی 60 ملیۆن یۆرۆ لە وەرزی 2024-2025 بووە. بەڵام ئەمە هێشتا زیانێکی گەورەی دەستکەوتەکانی تۆپی پێی بۆ جێهێشتن، ئەمەش لە ساڵێکدا بوو کە لە چامپیۆنزلیگ یارییان دەکرد. چاوەڕوانییەکە ئەوەیە ئەوان نزیک بوونەتەوە لە سنووری 60 ملیۆن یۆرۆیی وەرزی 2025-2026، ئەمەش بەو مانایەیە کە ئەوان بە زیانێکی قورسی دوو ساڵەوە دەچنە نێو ئەم وەرزەوە.

سنووری زیانی سێ ساڵەی ئەوان 60 ملیۆن یۆرۆیە، کە ئەگەر چەند نیشاندەرێکی باشی تەندروستیی دارایی بپێکن، دەکرێت بۆ 90 ملیۆن یۆرۆ بەرزبێتەوە، کە تیمی ئینگلیزییەکان بە دەگمەن ئەمە دەکەن. زۆر لەوە دەچێت کە پێویست بێت ئاستۆن ڤیلا لەم وەرزەدا قازانج تۆمار بکات.

پارەی چامپیۆنزلیگ و زیادبوونی نرخی بلیتی یارییەکان یارمەتیدەر دەبن، بەڵام شایەنی باسیشە کە زیانەکەی وەرزی 2024-2025 بڕی 52 ملیۆن پاوەند (نزیکەی 62 ملیۆن یۆرۆ) قازانجی فرۆشتنی یاریزانانی لەخۆ گرتبوو. ئەمەش بەو مانایەیە کە زیانی بنەڕەتیی ڤیلا پێش فرۆشتنی یاریزانان تەنانەت لەوەش گەورەتر بووە و بەردەوامبوونی فرۆشتنی یاریزانان پێویستە بۆ کەمکردنەوەی زیانەکان یان گۆڕینیان بۆ قازانج، وەکوو ئەوەی بۆ ئەمساڵ پێدەچێت پێویست بێت.

بۆیە پێویستە ڤیلا لەم وەرزەدا یاریزان بفرۆشێت و بە سروشتی، دەستبەرداربوون لە بەهادارترین یاریزانیان دەکرێت ئاسانترین رێگە بێت بۆ پابەندبوون بە یاساکانەوە. رۆجەرر دوو ساڵ و نیو لەمەوبەر لە میدڵزبرۆوە بە تەنیا حەوت ملیۆن پاوەند گەیشت، کە بۆ زۆرترین بڕی 15 ملیۆن پاوەند بەرز دەبێتەوە. تەنانەت ئەگەر میدڵزبرۆ مەرجی 20%ـی قازانجی فرۆشتنی داهاتووی هەبێت، ئەو بڕە پارەیەی کە بۆ گواستنەوەی رۆجەرز لە ڤیلا پێویستە ئەوەندە زۆرە کە هێشتا دەبێتە هۆی قازانجێکی دارایی ئێجگار گەورە لە هەژمارەکاندا.

ئەم قازانجه دەکرێت ئەوەندە گەورە بێت کە نیگەرانییەکانی پابەندبوون بە یاساکان لە یەک کاتدا لەناو ببات و هاوکات یارمەتی ڤیلا دەدات لەسەر رێژەی تێچووی تیمی خۆی (SCR)؛ هەفتەی رابردوو راگەیەندرا کە ئەوان بە بڕی 7.5 ملیۆن یۆرۆ بە بێ مەرج سزای دارایی دراون بەهۆی پێشێلکردنی SCRـی یوێفا بۆ دووەم ساڵی لەسەریەک، لەگەڵ ئەگەری 15 ملیۆن یۆرۆی دیکە ئەگەر بەردەوام نەبن لە “کەمکردنەوەی بەرچاوی رێژەی تێچووی تیمی خۆیان لە ساڵی 2026”. یەک لەسەر سێی قازانجی یاریزانان لە هەژمارکردنی ساڵانەی SCR هەژمار دەکرێت.

رۆجەرز دەکرێت ئاسانترین چارەسەری ڤیلا بێت بەڵام ئەوان زۆر زیاتر پێیان باشە بیهێڵنەوە. ئەنجامدانی ئەمە پێویستی بە بازرگانیی قازانجبەخشی ئاراستەکراو هەیە لە شوێنی دیکەدا و بەدووریش نییە بە قەبارەیەکی گەورە بێت. ئەگەر ئەو فرۆشتنانە نەیەنەدی، یارییەکی ئاڵۆز لە کاتدا دێتە ئاراوە. ڤیلا تاوەکوو 30ـی حوزەیرانی 2027 کاتی هەیە بۆ رێکخستنی ئامارەکانی ئەم وەرزە، بەڵام کاتێک ئەو بەروارە نزیک دەبێتەوە، بێئومێدبوونیش زیاتر دەبێت. ئەوانی دیکەش چاودێریی دەکەن.