بارسێلۆنا دڵخۆش دەکات؛ بایرن میونشن گرنگی بە ئەستێرەیەکی دیکەی ئایندهۆڤن دەدات
تەنیا ئیسماعیل سایبەری نییە
یاریگا –
بەگوێرەی راپۆرتەکان، ئیسماعیل سایبەری زۆر نزیکە لە گواستنەوەی لە ئایندهۆڤنەوە بۆ یانەی بایرن میونشن.
بەگوێرەی زانیارییەکانی پێگەی EDـی هۆڵەندی، سایبەری لەگەڵ بایرن میونشن گەیشتووەتە رێککەوتنی کەسی. کێشەی سەرەکی ئێستا ئەوەیە کە بایرن و ئایندهۆڤن لەسەر تێچووی گواستنەوەکە رێکبکەون. چاوەڕوان دەکرێت ئۆفەری یەکەمی بایرن نزیک بێت لە ژمارەی پێوانەیی گواستنەوەی ئایندهۆڤن، کە نزیکەی 48 ملیۆن یۆرۆیە بە پاداشتەکانیشەوە.
سایبەری هیچ نیشانەیەکی سەرنجشێواندنی پێوە دیار نەبوو، کاتێک دوو گۆڵی بۆ تیمی نیشتمانیی تۆپی پێی مەغریب لە سەرکەوتنە دۆستانەکەیاندا بە ئەنجامی 4-0 بەسەر ماداگاسکاردا کرد.
بەگوێرەی هەمان سەرچاوە، عەلی دورسون، بریکاری کارەکانی سایبەری، رۆژی سێشەممە لە یاریگای ئایندهۆڤن بینراوە بۆ گفتوگۆکردن. دورسون پێشتر دانوستاندنی بۆ گواستنەوە گەورەکانی ئایندهۆڤن کردووە، لەوانەش؛ نۆوا لانگ بۆ ناپۆلی و جۆردان تێزێ بۆ مۆناکۆ.
بایرن چاودێریی سێرجینیۆ دێست دەکات
بۆ ئێستا هیچ دانوستانێک لەنێوان بایرن و پێ ئێس ڤی بۆ دێست نییە، بەڵام بەگوێرەی سەرچاوەکە، بایرن میونشن نوێنەرانی یاریزانەکەی لە ئارەزووی خۆی ئاگادار کردووەتەوە. سەرچاوەکە ئاماژە بەوەش دەکات کە بەهای دێست بە نزیکەی 23 – 25 ملیۆن یۆرۆ دەخەمڵێنرێت، هەرچەندە چاوەڕوان دەکرێت گواستنەوەی ئەو دوای مۆندیال بە شێوەیەکی جیدیتر گفتوگۆی لەسەر بکرێت.
دەکرێت ئایندهۆڤن بەرەو بازاڕێکی گواستنەوەی زۆر جەنجاڵ بڕوات. سایبەری دەکرێت لە گرێبەستێکدا کە بەهاکەی نزیکە لە 50 ملیۆن یۆرۆ یانەکە جێبهێڵێت. دێست سەرنجی چەندین یانەی دەرەکی راکێشاوە. هاوکات یانەکە بەدوای بەهێزکردنی ریزەکانیدا دەگەڕێت، کە بەگوێرەی راپۆرتەکان یاریزانانی وەکوو کۆدای سانۆ لەژێر چاودێریی ئەوانن.
ئەگەر هەم سایبەری و هەم دێست بڕۆن، ئایندهۆڤن پاڵپشتییەکی دارایی گەورە بەدەست دەهێنێت بەڵام هاوکات دوو یاریزانی سەرەکی لە پێکهاتەکەی یانەکەیدا لەدەست دەدات.
بارسێلۆنا دڵخۆش دەبێت
بایرن میونشن دەتوانێت خۆشی بۆ بارسێلۆنا بهێنێت. بەرگریکارەکەی ئایندهۆڤن لە بارسێلۆناوە بەرەو تیمە هۆڵەندییەکە هەنگاوی نا، بەڵام تیمە ئیسپانییەکە رێژەیەک لە فرۆشتنی داهاتووی بۆ خۆی پاراست، بە دیارییکراویش رێژەی 20%. بەو پێیەی یانە باڤارییەکە یاریزانەکەی خستووەتە نێو بازنەی گرنگیپێدانی خۆیەوە، ئێستا لە ئەڵمانیا باس لە گواستنەوەی بۆ بایرن میونشن دەکرێت، بەجۆرێک کە یانەکە ئامادەیە بڕی نزیکەی 18 ملیۆن یۆرۆ بۆ ئەم بەرگریکارە بدات. ئەمەش بە واتای نزیکەی چوار ملیۆن بۆ بارسێلۆنا دێت.
